التوائل 01

بسم الله وعلى بركة الله و بعدما استمتعنا طيلة شهر رمضان بابداعات الاستاذ لزعر التسولي أحمد مع ذكريات عمي بوشتى نعود لاتمام هذا المسلسل الجميل ونتمنى من الله التوفيق من خلال هذه المساهمة البسيطة .

سالا عمي بوشتى الصيف ديالو وجا وقت التوقاف دالتبن وعقد على عياد ولد عمو البشير وعلى علال جارو وحميدة بن السي علي جارو وعمي امحمد والفقير الحوسين دعامر باش يعاونوه فالتوقاف دالتبن حيت هاد العام الناس كاملة صيفت وكانت الصابة تبارك الله مزيانة . عمي بوشتى دخل صحفة ونص دالقماح وصحفة دالشعير وخمس مدود دالفول وموداين دالحمص وشي بركة دالعدس ، المهم اسيادنا تجمعو العباد مور العاصر ولقاو توازة ، على نغمات طياب العينب ، ها دي ايزيد التبن بالمدرة للوص دالنادر ها دي واقف فوق التبن ايدكن برجلاه ، وعياد قابط حاد القصبة طويلة ايقادد بيها الجناب دالنادر و عمي امحمد ايلقي الجريد على النادر واحميدة وعمي بوشتى ايوقفو السهوما دالصابرة مع الجناب و حمو ايدور التكليسة دالنادر بالسدرة باش ما يمشيو ليلا البهايم و الفقير الحوسين ايدور بيها السلك ويطاشي بحاد اللقاط وكلشي ايصلي على النبي والصافية قابطة التيريفو و ادصور قلك مشي تسيفط التصاور للمجموعة باش كلشي يعرف كيفاش التسول ايوقفو التبن ودادة حادة غابرة فالنوالة ادوجدلم خرينكو والمفروق وحدهوم ودادا فاطنة ايصغبو الطعام باش مشي يلقيواه بداك الحليب دي جمعو فالصباح من الدار دحميدة وعلال حيت هوما دي عندم لبقار .
الحاصول وما فيه كملت النادر بقى خاص غي داك القبوزة فالراس بقاو ايعاينو عبسلام هو دي مشي يصغبا حيت هو معلم ماصو وايخدم فوجدة . جابلم عمي بوشتى القهوة واتاي وخرينكو والمفروق للنادر تعوفو و رتاحو حاد الشواي و عباهم للدار ودخلم للسطيحة .
السطيحة دعمي بوشتى كانت محنكة ومزرقة مزيان ادشعل . فحاد اغارب كان علقلم عبد الغني العباسي الترفازة زمارتيفي وحاد التصويرة كبيرة دعبسلام واقف فالساحة دسيدي عبد الوهاب فوجدة بالسبردينة رايبوك والدجين والنضاضر ، وفاغارب لاخور عمي بوشتى معلق شي تصاور قدام فيهم جوج دائرات بلخضر والصفر مشى منم اللون ديالم وطحاو باهتين ، الدائرة اللولة فيها ام كلثوم والدائرة الثانية فيها عبد الحليم حافظ وحداهم تصويرة اخرى فيها مولاي عبد القادر الجيلالي واقف وتحت منا بوسطيرا كبيرة دالبارصا جابا حمو من الحد وعلقا تما حيت هو بارصاوي ، وحاد التارازة مزيانة ومزوقة مع الجناب بالصوفة حمرا وشي نواشات هواذين منا وحداها شي شواط دالسبول دلاسايا مصغب بحاد الطريقة عجيبة معلقينو فحاد المسمار .
المهم تجمعو ليشاشرة على حاد الطبلة باقية جديدة وكبيرة عاد شراها عمي بوشتى من الحد مناين عرف بلي سليفتو ماجية عندو من فاس فهاد العطلة ، وحادة لقاتلا حاد الميكا بيطا فيها شلا تصاور دالبتيخ والدلاح والسويهلة والخوخ ، جاب حمو الشلال ، وتعشاو الناس بالطعام والحليب هو اللول وعاد جابلم بوشتى حاد الدك بلدي بالزبيب ونزل معاه العينب وقسمولم كل وحيد عطاه رتشومة ديالو حداه (الرتشومة هي عنقود صغير) ومناين سالاو جابلم حاد الطبسي دالدلاح ، كلاو وسالاو وخسلو يداهم ، ها اللي جبد بشنيخة ينقي بيها طراسو ها اللي جبد طابا ، عمي بوشتى جبد الباكية دكازا وكمى . جا حمو شعلم الترفزة ووركو على الخدادي وبداو يتفرجو .
علال : شاتنا بيها لله يا هادي هي الترفزة وحيد بالاك ، بشحال شريثا أ بوشتى ؟
بوشتى : أودي ما شريتاشاي غي جابا الله
عياد : قلك اسيدي ربحا فداك الهم دي ايقولولو مرجان مناين مشى داك النهار لفاس
عمي امحمد : ايوا لقينا المغريب نتصنتو على الطقس
حمو : ما فيهشاي المغريب هاد الاتجاه راني قالب لهوت برد
عمي امحمد : شني ادقول ؟ الموت دالصهد ونتينا ادقلنا الموت دالبرد .
حمو : هههههههه هوت برد اعمي امحمد موشاي موت دالبرد . هاد هوت برد هو الاتجاه دالمانيا باش انتفرجو فكاس العالم فداك الاداعة د الزدف .
عمي امحمد : خيار . قلي لاقي الاتجاه د النصارى
علال : بعدا والله ايلا يا المغريب يا لعب مزيان غي داك المسخوط دداك بوخواشم دالحكم هو دي ما عطاهمشاي الغلب .
بوشتى : حتى يانا تفرجت والله ايلا زيرو باباهم داك البرتقيز ، داك الزندوح د رولاندو والله ما قاصا ككككل فاين ما ايبغي يقبطا ايجي ليلو داك ولد عطية ايحشلو عكيلة ويجيبو منفوط .
حمو : البرتقيز والسبليون واخا غلبو وgازو جاب الله دي غلبم حتى هوما وجاو فحالم .
الفقير الحوسين : ايوا احييييح فيهم . ربي ما ايوقفشاي مع الغشاشا .
عياد : قلك هاد كاس العالم كل عام ايلقيواه فدولة هاد العام لاقيينو فسوريا
بوشتى : لواه افغانستان . نحوطوك نتينا غي دجيبنا لخبار ، أ روسيا أ الحول موشاي سوريا . هاداك ما بقالا سوريا غي كاس العالم .
الفقير الحوسين : ومعامن مشي يلعب المغريب عاوث ؟
حمو : سالاو المغاربة صافي وقبطو الطيارة وجاو فحالم .
عمي امحمد : ايوا المغاربة هوما دي ادعاينم الناس يلقيو الطايلة ، غي الضيعة دالفلوس وصافي لايلاها الا الله .
عياد : قلي أ بوشتى . ما دبيعليشاي الترفزة لخرا الصغيرة دي عندك ؟
بوشتى : عطيني ربعالاف وعبيها .
عياد : ربعالاف بزاف ، مشي نعطيك خمسطاش لميا ونزيدك الموسجالا ديالي .
بوشتى : انا ما بقى عندي gانا دالموسجالا وزايدون ما بقى حد دابا ايخدم الموسجالة . عطيني تلتالاف والله يربحك .
عياد : هاك ها الفين و ستميا حتى للشهر الماجي ونعطيهالك باراكا عليك ابوشتى .
بوشتى : الله يسخر اسيدي ، والله ما دصيبا بهاد التمان ، راها ترفزة النيمير الوحيد الصورة ديالا ادشعل دقول نتينا المرايا .
حاد الشواي وهي دجي حاد اللقطة ما فيها ما يتشاف ناض كل وحيد ايفافي على صباطو وتمو خارجين هادا ايعفس فهادا . عمي بوشتى نتر البريز دالترفزة بالزربة وناض خرج موراهم ودعم وقلم الله يرحم الوالدين و جر عياد خلاه معاه باش يرجعو هو وعبسلام يكملو النادر يصغبولا القبوزة بالغيس وشواي دالحجار .
طلع عبسلام فوق الراس دالنادر وعياد ايمدلو الحجار وعمي بوشتى ايضويلم بلاتريك . حاد الشواي والتيريفو دعبسلام سرسر . جبدو ولقاه على ودنو .
عبسلام : الو شكون معاي .
الصافية : انا الصافية
عبسلام : شكون الصافية
الصافية : ايولي على شكون الصافية ! الصافية ختك .
عبسلام : مالك شني خصك ؟
الصافية : مشي نقلك حاد الخبار عاد سمعتو دابا
عبسلام : شنيهو هاد الخبار ؟ الله يسمعنا خير
الصافية : سمعت دادا فاطنة ادقول ليما نهار الخميس مشي يجي عبقادر ولدا داك المخازني دي فخريبكة ومشي يمشيو يخطبولو يامنة
عبسلام غي سمع هاد الخبر ما بقاش ايشوف قدامو وجاه بودهوار ويصيب راسو هواد اينكور من فوق النادر ويجي التحت منفوط فوق السدرة هههههههههه
نخليو عمي بوشتى وعياد اينوضو فعبسلام وايشوفو شني طرالو والى اللقاء في الحلقة المقبلة ان شاء الله .
دامت لكم البسمة .

توقيع: عزيز البورقادي

تصنيف : الثقافة التسولية,طرائف عمي بوشتة