التسولي وبن لادن

في أواخر سنة 2001 واحد التسولي تسوق للأرباع دبني لنت وتلاقى حاد صاحبو فالسوق ومشاو للقيطون يشربو أتاي وبداو زعما أيهضرو فالسياسة قالو : كان أعبسلام (كان كلمة يستعملها التسول عندما يريدون طرح السؤال ) أنسمع فالراضيون الصوحافة ايهضرو بزاف على بلادن بلادن ما كا غي بلادن . شنيهو هاد بلادن ؟

جاوبو صاحبو قالو كامعرفتشاي شكونهو بلادن 
قالو لا
قالو واقيلا 

نتينا اصاحبي ما عايشاي فوق لرط . الدنيا كاملا مقلوبة على بلادن ونتينا ما دعرفوشي

قالو كان عندي الراضيون ساكث تسالاولو الحجار السوق دي gاز عاد شريثملو . شنيهو هاد بلادن ؟

قالو أصحابي بلادن راه طيح جوج كاطريامات لماريكان
ههههههههههه ناطحات السحاب سماهم هو كاطريامات حيت التسولي عندو العمارة ايلا علات ايلا علات كتوصل كاطريام هاد الشي اللي شاف فتازة وفاس وواد أمليل

توقيع: عزيز البورقادي.

اقرء المزيد

جماعات قبيلة التسول

السلام عليكم ورحمة الله
اشنو رأيكم كل عضو فالمجموعة يعطينا معلومات على الجماعة ديالو ولا المنطقة اللي كينتمي ليها كيفما كانت نوعية هذه المعلومات لتعم الفائدة وأبدأ أنا بهذه المعلومات البسيطة :
تتكون قبيلة التسول من 5 جماعات قروية كلها تابعة اداريا لدائرة وادي امليل وهذه الجماعات هي : 
جماعة بني فراسن بمساحة 200 كلمتر مربع
جماعة بني لنت بمساحة 88 كلمتر مربع
جماعة اولاد الشريف بمساحة 72 كلمتر مربع

جماعة الريع الفوقي بمساحة 69 كلمتر مربع
جماعة اولاد ازباير بمساحة 106 كلمتر مربع

توقيع: عزيز البورقادي.

اقرء المزيد

ذكريات أحمد النقير.

 

السلام وعليكم خوتي غادي نعاود ليكم واحد القصة وقعت لي وانا صغير ولكن مضحكوش علي واحد النهار كنا كنطحنو الزيتون كان الواليد الله يواليه برحمته وكان ولد عمي وحنا وجوج بنات عمامي قدي فالعمر كنا كنسقيو الما من الواد بالقرعة دخمسة يطرو كانت تجينا ثقيلة كنوصلوها بستة وستين كشفة ولكن معلينا هي وصلت الضهر والاخت ديالي الله يطولها فالعمر جابت الغدا gلسنا ناكلو الزيت الجديدة وانا عقلي غير مع القرعة خاصني نسبق بنات عمي للواد أنا والله ما كنت عارف فاين هو النقير (النقير هو الصهريج فين كيتجمع الزيت) وكان الواليد داير عليه واحد الميكة مغطيه هزيت القرعة خاوية ونتييس ياخوتي ديريكت للنقير ماعرفت راسي باش تبليت واش طايح فالبير ولا فالنقير هزوني مغتر بالزيت الاب ديالي بغى يقتلني غير ختي وولد عمي مخلاواهش وانا مهدرت متكلمت تصدمت إوا زولتلي ختي الحوايج ولواتني فالجلاب دالواليد قيال مسمر حداهم وأنا انشرق بالزيت حتى العشية ومشينا للدار ولكن الاب ديالي تفقص محيت الزيت كولشي فاض على برا ولكن اختي قالت الاب ديالي والله ما ضربو على الزيت خافت يجرالي شي حاجة الله يحفضها ليا وشكرا

توقيع أحمد كروني.

اقرء المزيد

سلطان القبيلة الجزء 09.

الزبدة والحليب كانو خواتات وفارقوهم العيالات
فهاذ الزمان قلب على ولاد الناس والخواتات
تفاجي على قلبك ومعاهم بالحديث تقيل وتبات 
شحال من رجال صارعو الدنيا الله يرحم لي مات
الدنيا دايرة بحال الغولا شحال من اجيال مشات
حتى كيجي الخبر كيقولو بأن فلان مسكين مات
عيش راجل وخليها على ربي كيف ما جات جات

سيد السلطان ياسيادي الجواد بالحقيقة للمسكينة باح، وباش حتى خاطرو يتهنى ويرتاح، جاوباتو بالسكات وكيف كيقولو اللوالا السكوت علامات الرضى. سقساها شلا اسئلة جوباتو بكل ما وقع وسار، وحكاتلو حتى على اخبار الدار. الشيخ كان دايز طريق وهو يشوف المنظر.قال مع بالو كيفاش سيد السلطان مجمع مع بنت فلان من بعد ما كان همة وشان. ولا كيجمع مع السراح والصبيان. هادي مادكون غير طيحتلو فجنان؟
الشيخ رفدا سخونة ووصلا لباباين المسكينة وقالو وجد راسك لبروسي والمحنة. الشيباني بقا تالف ومن امر السلطان خايف.ما عليه غي اشلط جلابتو على اقفاه. واقصد دار السلطان وباش كان يفاريها معاه.إما يخلص الخطية او يرغبو ويترجاه.غي وصل للقصر تلاقى مع السلطان الوجه الوجه
سيدي انا تحت امرك، شوف من حالي وصفي خاطرك وقلبك. وخا غي على وجه ديك اليتيمة راها محرومة من الميمة. جاوبو السلطان بالضحكة والتبسيمة زيد مرحبا الشريف باين قلبك رهيف وعلى الخاطر خفيف...

وعلى المودة نلتقي.

توقيع: عبد الحق كريط.

اقرء المزيد

التصور التسولي للزوايا.

كثيرا ما كنا نسمع ونحن صغارا عبارة "أنا ماشي للزاوية، أنا كنت فالزاوية" ولم أكن أنا شخصيا أعلم مدلولها ولا المكان الذي تحيل عليه حتى أخذني جدي رحمه الله ذات يوم إلى بيت يقع وسط بستان من الأشجار المثمرة (برقوق ومشمش ولوز وتين وعنب ....) استقبلنا صاحبه بحفاوة وترحاب كبيرين وأكرمنا غاية الكرم، وكان كل مرة يقول لجدي: مرحبا بك ألهادي فالزاوية، فيرد عليه المرحوم: بك أولى أسيدي عبد الرحمان(1) آنذاك فهمت معنى كلمة زاوية، وما تحيل عليه من مدلول روحي واجتماعي.

 إنها دار للضيافة تقع وسط منازل الشرفاء والتي كانت تعتبر قبلة ومزارا لسكان القبيلة لأخذ البركة أو التداوي من بعض الأمراض المستعصية على الطب الحديث، أو لمجرد تبادل أطراف الحديث مع الشريف واستشارته في بعض الأمور، وفي أغلب الأحيان كان الزوار يأتون إلى الشرفاء مشتكين ممن تعدوا عليهم طالبين تدخلهم لحل الخلاف، فكان هؤلاء يقومون بالواجب دون تردد، وغالبا ما كانت وساطاتهم تنجح فيتصالح المختلفون ويردون الحق لصاحبه.

إن الزاوية التي نعرفها في المنطقة تختلف اختلافا بينا عن الزاوية بالمفهوم المتعارف عليه حاليا والتي ترتبط بطريقة معينة في الزهد والتصوف والنظر إلى الأمور الدنيوية، بل ويعتبر بعضها مشتلا لتربية وتكوين أطر يتم تعيينهم في مناصب سامية في قطاعات معينة (أحسن مثال على ذلك الزاوية القادرية البودشيشية التي ينتمي أغلب المسؤولين السامين بوزارة الأوقاف والشؤون الإسلامية إليها وذلك بحكم التوجه الصوفي للسيد الوزير الذي يعتبر أحد "فقراء" هاته الزاوية)، فالزاوية عندنا ما هي إلا منزل لأحد الشرفاء مشيد وسط بستان من الأشجار فيه عين ماء جارية يقصده الناس للتبرك أو لقضاء حاجة من حوائج الدنيا دون طمع في نفوذ أو جاه، إنها مثال  لتجلي الكرم والتسامح والأريحية في أبهى صورها.         

ــــــــــــــــــــــــــ

(1) المقصود هو الشريف سيدي عبد الرحمان الوزاني رحمه الله، وهو من الشرفاء الوزانيين الذين يسكنون في عين صدينا دوار منادلة، جماعة أولاد الشريف، وما زالت هاته الزاوية قائمة الذات لحد الساعة وإن قل زوارها بسبب العصرنة وتغير الأفكار ''للأسوء مع الأسف''.

توقيع: أحمد لزعر التسولي.

اقرء المزيد

مساجد قبيلة التسول.

تتوفر قبيلة التسول على 277 مسجدا منها 119 مسجدا جامعا، (أي تقام فيه صلاة الجمعة) والباقي مساجد خاصة للصلوات الخمس فقط ومقسمة على الجماعات الخمس حسب الآتي:

جماعة بني فراصن : 99 مسجدا منها 49 مسجدا جامعا.

جماعة أولاد ازباير : 61 مسجدا منها 23 مسجدا جامعا.

جماعة بني لنت : 52 مسجدا منها 24 مسجدا جامعا.

جماعة أولاد الشريف : 36 مسجدا منها 11 مسجدا جامعا.

جماعة الربع الفوقي: 29 مسجدا منها 12 مسجدا جامعا. 

توقيع: أحمد لزعر التسولي.

اقرء المزيد

التسولي والشلاضة.

من المعروف عندنا فالقبيلة أننا لم نتعود على أكل الشلايض، ما كاين غي صحن دالعدس أو دالبيصار وشي بصلة أو شي فلفلاث مقليين وأرا برع، حد النهار جاو شي ضياف مالمدينة عند واحد التسولي، جا الراجل بغا زعما يصغب فيها راه ولد الوقت مشى تسوق وجاب معه الخص والباربا وداك التخربيق دي أيصغبو به الشلايض، ومع كانث عندو حد العروسة أدعرف لهذ الشي حد الشويش السيد كان معول عليها، المهم العروسة قامث باللازم وخلطث الشلاضة فالبانيو وبقا ناقصا غير دلقيها فالطباسل الصغارين، الحاصول الناس جاو، ناضث العكوزة أدسخر ودجيب فالخبز والشعرية بلحليب والدجاج بلدي واللحم والخيرات ونساث الشلاضة (حيت ما موالفاش بها) الناس تغداو وخسلو يداهم وناضو ماشيين فحالم حتى خرجو وبعدو على الدار بشي 100 ميط عاد تفكرث الشلاضة ودخرج أدسبك ودعيط: آرجعو ألناس رجعو داكلو الشلاضة.

هذ القضية دالشلاضة باقي لدابا عندي معها مشكل أنا بعدا، سبحان الله ما أنحملا ما أنقبلا، وأنعيا زعما نصغب فيها مديني وناكلا الساعة والو، أناكلا نهار ونبطلا عام.

وعلى المودة نلتقي.
طابت أوقاتكم بكل خير.

توقيع: أحمد لزعر التسولي.

اقرء المزيد

رحلة حياة تسولي حر 02.

بسم الله وبها المبدا، الصلاة على نبينا علينا فرض ماشي عادة، المومن لخاه سند وعدة، والحبيب على حبيبو يربي الكبدة، واللي نكر حبابو عرا جنبو للعدا.
صاحب الصادق دصدق ،صاحب الغدار يعلمك دسرق، صاحب الكريم فخيرو دغرق ،صاحب الشحيح يطمع فيك عليه دنفق، الصاحب هو ديكمل معاك الطريق وديخوي بيك لا تعملو رفيق.
المحلوبة عمرا دكون دم، والمعصورة دألم، على الخير عمرك دندم، وجهو لربي ماشي لبنادم ،حتى يلا كان نكار وما أيحشم يبقى أجرك تابت عند الله مزمم.
طريق الحق واضح ووافي، وطريق الباطل عوافي، ديبيع يكون صافي ،وديكيل يكيل بالعبار الوافي.
الحاصول ألحباب بعد ما فتحنا الباب بعام الزيادة، نحكيلكم هاد النهار على يوم الولادة.
فيوم من أيام الربيع ،الوقت ضحى والناس كاملة فشغلا سارحة، كانت السما صافية والشمس دافية، بابا مسمر قبالث الدار فالكدية، وجدي مع السارح أيضحي، ونانا فالعين دمكلسة أدلقط الربيع هي وشي نسا، عماماثي ويما كلها فشغلا، ها دأدوجد الغدا،ها دأدسقي الما، ها دأدعتق دبقى فالدار من البكمة.
حدشويش ويما شدا الحريق دالولدة،بقاث أدور من بيث لبيث والحال ماهناها، عيطث على نانا وسرذث بابا مور حناه وحناها، حيث كانث هي القابلة ددالوار وعلى يدا زاد شحال من لنتة وذكر، رgب بابا موراها أيجري وجاث حنا فجلايلة أدعتر، وجابث معاها حلعتوقة وحطان دالبيض، وخا الخير كان عندنا غي أيفيض، جدي شافا رgبث على الباب دالصاف، عرف شني كاين، شلط الكسيبة والبقر للحيط(البور) مع السارح، وجا لكدية دسيدي صايم أيعاين، وبابا قدام الدار ساهي وأيفكر، بنالي وأنا مزال فالأرحام قصور من الأوهام، وأيطلب : ياربي عطيني شي ذكر باش نسميه على جدي عمر.
حشويش الدار تقلبث بالتغريث، كنت هذاك أنا لهاد الدنيا جيث، دخل بابا أيجري وقال لنانا: كطفلة كدري شني ولدث؟ قاثلو : مبروك عليك العزري، كاكاينشي دعلى الطفلة أيزغرث؟ ، وجدي هود من الكدية أيرد رجلاه من قفاه، وبالحمد والشكر لربي معمر فاه،دخل للمراح وبقا أيفراح، أينgز يهود ويطلع ويقول : أسعدي بيامي تولدلي السبع، نانا عطاثا للجرا، جبذث فاين ما كان عندا شي gذوار أو درا رطبة غابرة، من الرزة دجدي عملولي سماط، وحراز على راسي باش ما يغلاط، وجابو ليما حد الحرشة بالزيث مسردة ، وشي بيضاث غي مصهدة، وبقاو أيلقمولا وحدة مور وحدة، وهي مسكينة أدgوط وخا ما قادة، غي باش دعمل الحليب لهاد ولدا، طيبولا عتوقة، عطاوها دشرب المريقة، وعملولا التعريقة باش دروح دغيا ودنوض للشقا، وخيكم عاطيها غي للزgا واع واع واع وفاين ما نفتح فاي أدعطيني يما نرطع، ودقول فكرشي القراقر ماأنبغي لا نشبع، جد بابا من النشاير جا أيجري ومدرgب على الراgوبة وهو أيفرح ويهدر وأيقول : أسعدي وفرحي بوليدي زادلو الذكر.
عملوا الصرة نهار تلتيام ، والنسا دالدوار جاو عالتمام، هادجايبا البيض فيداها ، هاد جايبا الجاج طايب أو خضر لحم، عملو بركوكس ودبحو شحال من ديك وفلوس، وقيالين ناشطين بحا دعندنا العرس.
حتى للسبوع ونعارضلكم، غي عاينو ووجدو راسكم.
وعلى المودة نتقاشعوا.

توقيع: أنوار زياد.

اقرء المزيد

سيرة حياة تسولي حر 03.

بسم الله والصلاة على النبي هي اللولة، خوتي التول السلام عليكم جملة، الحاصول خلينها فنهار السرة ، فاش تجمعوا النسا دالدوار ما بقاث حتى مرا، أما الرجال ممنوع عليهم يمشيو بالمرة، ما عدا شي حبيب قريب أو شي ضيف جابثو القدرة، وفهاد الستيام قبل ما نسبع بابا كان أيقيل قدامي مربع ، مرة أيرفذني فيدو بحال درافذ الفرخ دالقوباع، ومرة أيبقى فيا بعينو أيتبع، وأنا مرة ناعس مرة انزgي ونواعواع، مأنسكث حتى أيلقيولي البزول فاي نرطع، حلمرة عطيثا للزgا ما بغيث نسكتشاي، يما فيا حارث ونانا فبابا دارث قاثلو نوض دشوف شغلك ونتينا حدايا قارث، ومور حنا سرذث ، حيث هي المداوية ددالدوار كانث، أداوي على البرد وبومزوي والتقصيرة والتغراف، أدلك الباب وأدكوي على بونيف وعلقرينة بين الكتاف، أدقلب الحمل ودولد النسا حتى رجعث الله يرحما هي حناين مكلسة، شحال من واحد زادلو ربي فبوحبل على يدا، كانث فالقبيلة طبيب بلا خلصة لا كونجي لا صناثة لا ستيلو عندا، جاث الله يرحما أدجري وقاثلم زولو بالاكم خليوني نشوف مال هاد الدري، زولثلي السماط والgذاور، وعراثلي صابث طهري وكرشي كلشي حمر ، قاثلم الدم أينخصو شوفو طهرو كيف عامل بحا دشاعلين فيه المجامر، هذا خصو بأفرور يتمغر، ناضث نانا أدجري ، جابث حشقف دgروج، وتعاونو عليه أيدقوه بجوج، بشطاطو غربلو أفرور ، وبالزيث خلطو ومغرولي كرشي وطهري لور، الحاصول هذي gوزناها وgازث، والستيام نgهزث ، جاو جدي وحنا ديما وخوالي وحد عما، وجابو ملقمح خنشة وخنشة دالطحين، وحولي gرونو ملوزين، والشوارياث عامرين. حنا ديما مندجاث ما ناضث محدا بنتا، جابثلا جاجا طايبة مالدار ومن البيض كركار، وغي سخنث وبداث أدعطيها ويما أدقولا قلبي طالع معندي فاين نلقيها، وهي أدلقم ودعطيها وخا أدهدر ما أدعبيها فيها، وأدقولا كول أبنت الحولا، باش دلقي لحليب لابنك ودنوض صحيحة لشغلك، جدي ديما كان مقدم دالخيالة فولاد الشريف، عمل معاهم يوصلو قبل المغرب باش الخيل دكول ودشرب والخيالة يروحوا مشي يصبحوا على البارود غي درب ، جدي دبابا علم الرباعة دنgوشت ومكلسة، وملمعلمين علم الشيخ الهادي، وقالو جيبلي الطبالة القشاقشية دأيهردو البواردي، جاو الحباب من الدار البيضا ومن فاس وناض السبg والجرا بلا قياس، السارح سرذاثو حنا يعلم الناس دعندم الحليب يجمعوهلم فالصباح، عماماثي شطبو وفرشو الغرفاث والبيوث والمراح، شعلوا الفرنة والعواد موجودين من الغابة حطبم بابا والناس دالجماعة كاملين، وطيبو مخرينgو ميدونة والمفروق وحرشة قد رويضة دالكار سخونة، والخبز شحال من gصعة معجونة، الحاصول تعوفو وناض جدي ذبح الحولي دجابو أولاد الشريف وعملوا العشا للخيالة ودجا داك الليلة ضيف، حيث داك الحولي كان غي هدية والحولي دالعادة جابوه فسبوع ختي البكرية.
نخليو يتلاحقوا المعروضين ويgوز الليل ويصبح الصباح ومرحبا بكم لسبوعي نشبعوا تبوريدا فداك المراح.
وعلى المودة نتقاشعوا.

توقيع أنوار زياد.

اقرء المزيد

رحلة حياة تسولي حر 01.

بسم الله نبداو المهمة والصلاة على نبينا علينا لازمة ، السلام تحية الإسلام وعربون الأمان والسلام ، فالسلام على كل من معانا فالمجموعة رفيق وكل من قدام جدارنا جابثو الطريق درب علينا ترg يبة وعملنا جيم أو تعليق، خوتي كما وعدتكم مشي نبدا حكايات حياتي بعام الزيادة وخا كنت نشرت هادشي فتعليق مشي نعملو إعادة نزولا عند رغبة خيي الحاج وسي محمد البورقادي الله يسهل عليه وعلينا كاملين فشي حجة إنشاء الله.
معرفتش عاماش تولدت ، ولكن منين كنت أنسقصي يما أدقلي نتينا خالق فالنوار دالفول العام دمشى جدك للمسيرة(وحتى أصدقائي أيام الدراسة كانو أيقولولي " ولد المسيرة" وهو لقب طلقو علي أحد الأصدقاء من عين الحمام توظف فالبحرية إسمه زهق من ثقب ذاكرتي فكنعتذرلو ولكل من زهق معه) ونانا ( حنا) كانث أدقلي فالماكلة دالفول، وبين النوار والماكلة دالفول شحال من مرة تغانو ح نانا ويما وأنا كان أيعجبني نتفرج فيهم ،وفاين ما أنبغي نغانم أنسقصي يما قدام نانا أو العكس، يما أدقلا كلامك هو الكبير، مكنشاي حارثين الفول فالg رنة وأنا عاقلة فاش صابكم خالي(بابا معبي بنت عمثو) أدلقطو منم الربيع وناض ليلكم مخلالكمشاي بالمخطا ولحق غي ربيعة وجبد عليها بحاد الغردة رماث القفة وهربث وهو موراها أيجري ياك خبعناها غي فالروف دالقنية، ونانا أدرد عليها كلامك هو الكبير ياك أنا غي سبعنالو مشيث لعند علي فالدار البيضاء، كانث مراثو حتى هي هذاك شهرا ومشينا على السبت والفول كانو قاطعين الطريق فقراوة ولاد زباير وواد أمليل، ياك بينو وبين سي محمد دعلي غي خمسطاشر يوم ، نتينا بعدا أدعقلل آلطك، وأدرد عليها يما ياك بينو وبين الدري دفطيمة دموح غي سبعيام راني عاقلة أنا كنت نفيسة فالسبوع ديالو ومامشيتشاي مشاو غي ربيعة وعيشة (عماماتي)، وقبل مادكمل أدور فيها نانا : ولياه حنا فيواخ كنا جارينها مع فطيمة دموح باش نمشيو عندم فالسبوع، وأنا بعدا مشيث لعند علي خليث فطيمة دموح مازالا مولدث، وأدردلا يما: كلامك هو الكبير أمراث خالي داك العام ولدنا أنا وفطيمة دموح ومريم دموح وفطيمة دسي حمد فشهر واحد، ياك كنا متشاهرين ، وغي كنت أنسمع أنا هاد الهدرة أنمشي نسقصي الدراري دخالقين معايا فشهر واحد ، الله يذكرم بخير كاملين وحتى واحد مصيبتو متورخ باش نعرف فيواخ زدت وهايثا وأنخلي يما ونانا شاعلينها حتى أيفرقوه على كراع الكلب .
وعلى المودة نتقاشعو.

توقيع أنوار زياد.

اقرء المزيد

عمي بوشتى في فاس 05.

الكار خرج من الفيراج وهو يتلاقى مع الباراج دالجادارمية . الجادارمي دار خدمتو وقف الكار وطلب الوراق للشيفور والديسك ديال مراقبة السرعة disque chrono وصابو فايت السرعة القانونية وقيد ليه مخالفة . الشيفور عيا ما يرغب والو طبقو معاه القانون (تحية خالصة لرجال الدرك و الامن النزهاء)
بوشتى : والله ايلا عبر عليه هاد الشاف
حادة : كا هداك هو الشاف موحا دي ايعلمم يطيبو فالدوزيام
بوشتى : شي عقل عندك غي هدا وخلاص . شني مشي يطيب هاد الشاف موحا مع الشيفور دالكار أ هاد المطموسة
حادة : ايوا هداك ما قلي عقلي ما يصقصي حد وااااء
الشيفور قلع ما ايشوفشي قدامو وهو ايسب ويعرق وعمي بوشتى عجبو الحال حيت هداك الشيفور ما جاهش على gانتو وهو يقلو
بوشتى : ايوا دابا عاد لقي داك الديسك د "شيفورك أحليمة عباولو لاكريمة"
حادة : مصاب غي يلقيه والله ايلا ايعجبني
بوشتى : اسكت أ هاد الحولة انا راني غي انجننو
الشيفور : جات معاك ابو جلابة . انت هو اللي ضحك
شوية وهوما يتقادو مع الماشينة غادية لفاس
بوشتى : شفتي قداش هاد السخط دهاد الماشينة . وايسوكا حاد التولي من عندنا انعرفو ايقولولو محمد حسين تميم Mohamed Houcine Tamim ايسوك داك الغاضاب كامل وما فيهشاي بزاف د الفهاماث موشي بحا هاد خيينا (الشيفور)
حادة : كا بنية . ايوا عطاه الله الصحة قداش هاد السخط ايا بابا قد أمار الله . وايسوكا غي باحذو البالا و ما لاقيشاي معاه حتى الكريسون
بوشتى : كا الماشينة ايكون فيها الكريسون . طك يا مالي وطك معامن انهضر انا ومعامن مترافك
حادة : ايوا الله يرضي عليه بعدا التول فاين ما مشاو ايحمرو الوجه . كا غي مشينا فيها ولا هاد تامارة دي ضربنا مع داك ليهودي دداك الكار
بوشتى : هو ايسوك غي هديك دي أدجي موشاي هادي دي أدمشي وزايدون انا حلفت على الماشينة عمري لا ركبت فيها منهار دالشوهة دداك بيبية
زادو شويش وهوما يرgبو على الباراج (سد ادريس الاول)
حادة : شوف أبوشتى شا الgلتة قداش
بوشتى : أهادا الباراج أ الحولة موشي الgلتة
حادة : ياك الباراج gوزناه هو فاين كانو الجدارمية
بوشتى : هداك الباراج دالطريق وهادا الباراج د الما .
وهو يخرج المعكاف من السرجم دالكار وبدا اينعتلا
بوشتى : ريت دابا منهنا ورد ليهن ايتكناو بني وراين ومن الجيه لخرا فاين الما هادوك ايتكناو الحياينة .
شوية وهو gايز حاد الرموك وضوبل الكار ويقول لداك المعكاف يا قرط و عمي بوشتى بقى قابط غي حاد القرطة فيداه
بوشتى : أيما الحبيبة وعلى ليهودي بن ليهودي لاخور ورزاني فالمعكاف ديالي ما نصيبشي بحالو ككول
حادة : ايوا حتى هاداك المقراع ادحسبو نتينا معكاف . راه عند داك الشريف محمد البورقادي خير منو .
الشيفور : والله ايلا خرج فيك حتى نتينا شحال فيك دالفهاما . دابا نعطيك واحد البارابلوي عندي خاسر ديباني بيه ديرو معكاف
بوشتى : زعما ادرد لي الصرف ايوا غي حطيها فاين دجيك
وصل الكار لاولاد عياد . الشيفور عطاهم ربع ساعة يتغداو . نزلو كاملين وعمي بوشتى بقى ايتقل وقال لحادة
بوشتى : ما بقاشاي من داك المطلوعة حتى شدق ؟
حادة : أ والله يا حتى نهودو نتغداو والله ونعرف نجبد هاد الزوالغ دي راني مخبعة كاملين . ايوا لا قالا . الناس ياكلو و حنايا نبقاو أنشوفو فيهم
نزلو من الكار وهوما يتلاقاو مع السي عبدو بن علي (عبدالحي يسف) ماشي لمكناس فكار أخور
عبدو : أهلا عمي بوشتى
بوشتى : اهلل ولدي سمحلي يانا ما عرفتكشاي
عبدو : انا سميتي عبد الحي يسف
بوشتى : تبارك الله عليك اولدي . تولي وقيلا ياك ؟
عبدو : تولي حتى زراقو عيناي . والله يا فرصة سعيدة هادي تلاقيت مع عمي بوشتى ودادا حادة شخصيا . يالاهو ما نبقاوش واقفين . ندخلو لشي قهوة نتغداو ونتهاودو حا الشويش
حادة : ايه اوليدي راحنا فرينا ببوهيوف
المهم كلسو . حادة دوماندات الكفتة و بوشتى الدوارة وعبدو اللحم بالخرشوف
بوشتى : شاتنا بيها الله يا هاد الدوارة يا غزالة دلحس عليها صبابعك
حادة : حتى هاد الكفتة مخيرة . خاصنا غي شي براد داتاي
بوشتى : ايوا حتى نساليو ونشربو اتاي كاملين كا خصك دشرب غي نتين
عبدو : انجيبو جوج برارد أعمي بوشتى أنا دي مشي يخلص كلشي . راه نهار كبير هدا
حادة : ايوا الله يخلف عليك اولدي بعدا التول ديانا ايعجبوك غي فالكرم
عبدو : انا اللي نشكركوم نتوما راكوم المنشط الرئيسي ديال مجموعة تراث قبيلة التسول وديال السيت الجديد اللي صغبتو هاد السيمانة
بوشتى : شنيهو عاوث هاد الزيت
عبدو : السيت اعمي بوشتى هو واحد الموقع فالانترنيت صغبناه ايهضر على" قبيلة التسول تاريخ وحضارة " سميناه https://t-tsoul.blogspot.com
عمي بوشتى : ايوا الله يرضي عليكوم اولدي واخا يانا ما انفهمشاي فهاد الشي والله يعاونكوم وزيدو كابرو باش دحمرو لينا الوجا
تفارقو وكلها طلع فالكار ديالو . عمي بوشتى تكى مع راسو والكار قلع . بقى غادي حتى قرب للخرجة دلوطوروت فراس تبودة وعمي بوشتى زول السباط ديالو و تخرج واحد الريحة يا سيادي الحبايب شني ماشي نقلكوم قنابل الكروموجين فايتا الريحة دالجيفة بعشرين درجة . الشيفور تبنج وبلا ما يشعر صاب راسو ضاير على ليمين وماشي للبياج دلوطوروت هههههههه
نخليو الكار عند البياج دراس تبودة وإلى اللقاء في الجزء السادس إن شاء الله .
دامت لكم البسمة

اقرء المزيد