التوائل (25)

عمي بوشتى فيه النوبة دالفقيه هاد النهار ، هود للسوق بكري وتقضى خضيرة وشواي دالتمر و حاد الكيلو دالحلوة الشباكية من عند صاحبو مول البانيو الكبير ودرالو عليها شواي دالجلجلان وشرى حاد الدلاحة و كيلو دالسردين وشواي دالقصبور والكرافس ولقى كلشي فالشواري وطلع فحالو بكري قبل الضهور .

دادا حادة وجدات حاد الكصعة د خرينكو و المفروق كل مفروقة قد البخنوق دحدهوم ، وشي مطلوعات تبارك الله قد الرويضة دالبوكشليط ، ومن بعد قبطت حا البروgة وجابتا لعمي بوشتى gوز عليها بحا الخدمي باش يلقيو عليها المرقة للصحور و حمو صرداتو للبحيرة دموحند دعلي يجيبلم شي عروش دليقامة باش يلقيو اتاي . الصافية درزت لداك السردين شرملاتو وصغباتو و طلعت للغرفة شطباتا وفرشاتا ومشات دوجد الفطور .
عمي بوشتى لبس العباية ديالو اللي رقعتلو الصافية البارح و فرش فالدكانة على برا قبالة الغربي وتسرد حتى قربت المغرب وناض فافا على حا الغلاي مكفس رفدو وخرج للعرصة يتوضى . هو يالاه قال بسم الله وحدهوم gايزة على فوق الدار ادزحول وراخية هيسوستا سالا معاها رمضان ، شمات الريحة دالحوت وتمت ماجية بحا شي سلوكية تابعة الجرة . عمي بوشتى شافا ماجيا حيتو ناض بالزربة هز الغلاي ديالو ودار مور الهندية وكمل الوضو على خاطرو .
حدهوم : أخير أحادة ، مالك هاد النهار شفتك قيالة غابرة ما ضهرتشاي كككل
حادة : ايوا غي سكث ، زعما فينا النوبة دالفقيه هاد النهار أو نسيث ؟
حدهوم : اييه بصاح قالالي عياد ، كان أ الحبيبة ، ما دعطينيشاي البوطة الصغيرة ديالك نكمل عليها الفطور ؟ بنت ليهوذية لخرا ما صابث فيواخ دخوالي غي قبل المغرب
حادة : ما عندي ما نعطيك ، بوطة وحدة راني اندعمش بيها ، سير عيط على راجلك واجيو دفطرو معانا هاد النهار .
عمي بوشتى توضى وجاب داك الغلاي نزلو حدا الباب ومشى نيشان للجامع .
عمي امحمد : كا هداك بوشتى دي ماجي بداك العبايا مبخنسة ولاقي يداه موراه
حميدة : هو هداك ، وقيلا النوبة فيه هاد النهار ياك الفقيه
الفقيه : اييه ، وغدا راها عندك أ حميدة هاني فاي علمتك
بوشتى : السلام وعليكوم أ ليشاشرة ، كا باقي ما ودنت أ الفقيه شني أدعاين ؟
الفقيه : باقيلا حا الشواي ، أنا من نهار لقيت التيريفو الكبير ما بقيت انشوف فداك اليومية دبوعياد ، غي هو ايودن فجيبي ويانا انتبعو
بوشتى : خيار ، قلي حتى نتينا تبجدعت
الفقيه بقى ايعاين التيليفون يودن ساعة ما ودنشاي حقاش كان سيلونصيو ، شاف فالماكانة صاب الوقت خرج بخمسة الدقايق عاد ناض يودن ، المهم صلاو ومشاو هو وياه وعمي امحمد وحميدة للدار باش يفطرو ، صابو عياد فالباب واقف ايعاينم وقابط فيدو التسبيح
الفقيه : كا الصلاة ما ادصليشاي أ عياد والتسبيح ادسبح ؟
بوشتى : لاش يصلي هو باقي صغير لياه قد هدا أيصليو
عياد : زعما نتينا قطعت الحصير بالركوع ، ياك حتى نتينا ادصلي غي فوقاش ما رشقتلك ، على حساب الكانة واها
بوشتى : زيد ايوا زيد دخل و باراكا ما دليط فالهضرة .
دخلو للدار وطلعو للغرفة ، صابو الفطور منزل ، الطبلة عامرة والخير موجود ، المهم عمي بوشتى تهلا مزيان فالضياف ديالو . سالاو الفطور وتكاو وعطاوها للتهاويدة .
بوشتى : فايناهو الجيلي الاصفر دي كنت مغطي داك ليامات دالمهرجان أ عياد ؟
عياد : ايوا نتوما اللي تمتعتو فداك المهرجان أما يانا بقيت واحل غي مع الطونوبيلات كنت مشي نحماق ، شحال قدك ما دحطي ، ولايني الحمد لله صورنا فليسات الله يخلف على الجواد
الفقيه : ولايني gاز داك الشي غزال تبارك الله عليهم داك المنضمين كاملين و داك الدراري دالجمعية دالأوقاف
حمو : الجمعية دالآفاق أ السي موشاي الأوقاف ، غي نتينا خدام مع الاوقاف يحسابك كلشي أوقاف
امحمد : أنا شبعت فراجة بعدا فالخيالة وحتى داك الفرايجية وداك احيدوس دبني وراين عندم ما يقولو . فرجونا الله يرضي عليهم مهرجان gاز النيمير الوحيد ، شحال هادي ما شبعنا فراجة ، ولايني حتى نتينا أبوشتى قالولي لقيت ما عليك بالتبوريدة ما خليتشاي
بوشتى : ايوا غي خلاص واها ، وكثير مناين جاو داك الفرايجية ديانا دالتسول والحياينة ، و مناين جا داك البالا دالخياطي كان ايقولي عقلي غي طير واجي فالوص غي داك عزيز البورقادي كان كالس حدايا فالخزانة هو دي قبطني وما خلانيش قلي خليك نتينا كالس مع الشخشيات راها حاطة عليك العين
عياد : بشاخ يا مالي بشاخ كا حتى انتينا طحيت ادحسب راسك مع الشخشيات
بوشتى : ولياه لا ، ما عندك ما دعاود كانو حدايا شي نصارى مرة مرة يضورو حيتي ويقولولي صابا أونكل بوشتى صابا ، وكانو حدايا شي أساسيدا خرين جبدنا الهضرة يانا وياهم قالولي الشغل زيان فالتسول دابا مناين بدا يتحرك داك بوجمعة المداني
حمو : وا المجتمع المدني أبا موشاي بوجمعة المدني
حميدة : وحتى داك المعريض كان متول عطاهم الله الصحة داك الطفلات وداك المنظمين زعما عجبنا الحال بزاف وحمرونا الوجا
الفقيه : وداك الحفلة دالافتتاح gازت مخيرة شني منك يا برارد داتاي وشني منك يا طباسي دالحلوة
بوشتى : نتوما الطلبة بلا أتاي وحلوة أيجيكوم واقيلا الشغل ناقص ياك الفقيه
عياد : ايوا لهيتونا بالهضرة على هاد المهرجان وما شعلتوناشاي الترفازة نتفرجو فداك الكانيرا المخفية دي ادgوز مور الفطور
بوشتى : شعل أولدي داك الترفازة حداك شعل
حمو : أضايع البارابول أ بابا .
بوشتى : كيف صرالو حتى ضاع ؟
حمو : بحينا الصافية نزلت شي حبات دالبيتزا فالطاقة شاطو من الفطور دالبارح ونسات ما حجراتمشاي وبقات ادهضر فالتيليفون ، ومشى ليلم القط دعمي عياد ، شافتو يما وشيرات عليه باليد دالمهراز وخطاتو ودجيبا فالطبسي دالبارابول وعوجاتو ما بقاشاي قابط
بوشتى : شوفلك إيوا بنت العوجة لخرا
الفقيه : ايوا الله يهنيكم أليشاشرة أنا ننوض بحرا نوصل للجامع راها قريبة العشا
عياد : وقيلا ننوضو كاملين حتى يانا نمشي معاكوم بحرا نلحقو نصليو شي ركيعات دالتراويح
بوشتى : والمغرب صليتا بعدا بقالك غي التراويح
ناضو خرجو ومشاو للجامع ، وحمو جمع الطبلة و ومشى بالزربة لبس التحزيمة ديالو ، السوفيطمة دالبارصا فيها النمرة عشرة كان شراها من الخوردة من يامات رونالدينو والشورط اخضر د الراجا والتقاشر صوفر طوالين دعمي بوشتى ولبس داك باطا خنيز ديالو وخرج مشى أيسبك للحد حقاش عندم التورنوا درمضان .
حمو مقيد مع الفرقة دالحد ( أولمبيك أمل الفيلاج ) ومشي يلعبو ضد الفرقة د بني فراسن ( نهضة شباب سوق السبت )
السي محمد البوعلايي هو لاربيط جابوه من البرانس باش يكون محايد ، تعطات الانطلاقة ، الكرة عند الغازي دالطليح ، عطاها لموحند دصفية ايزولالو الطاهر دبوهيوف مشى بيها أيراوغ وأيعطيها لحمو ، حمو أيتيري فاااااط ، الكورة ادخرج من الملعب ليهن وادجي فحاد المرجة حدا الواد حتى نقزو شي قراقر كانو تما ، مشاو ليلا شي حيابر جابوها ، تيراها الحارس دسوق السبت عند علي د الزنفيل ايزولالو بوجمعة التكنزيز ، مشى ليلو حمو ايسبك لوالو عكيلة وجابو منفوط وزولالو وتم ماشي بيها وهو يغردا عونيث بداك باطا خنيز فاااااط حتى دخلت مور الخط وردا الحارس ، ناضو باللغالغ أيشعونو ، شي أيقول بيت وشي أيقول موشاي بيت ، والحكم السي البوعلايي وقف ولقى بيداه داك الاشارة دالمربع وقالم نشوفو ال VAR
السي Noureddin tazi والسي Mohamed Sbaai والسي Mohammed Jlibane كانو مع المفرجين ايتفرجو وقابطين التيليفونات فيداهم وايصورو ، جا عندم لاربيط وشاف داك اللقطة فالتيليفونات بثلاثة وعاودا شلا دالخطرات من جميع الزوايا حتى خوالم الباطري ورجع للملعب ايسبك وقلم موشاي بيت . المهم رماو عليه التقليد ، تلعبت الكورة ، اللعب بدا يقصاح شواي ، ولد مليكة عطاواه الكورة زولالو حمو وتم طالع بيها كا ويجي ليلو حميدة العنكرة ايسبك كان عاد كمى حاد الجوان ، بغى يطرب الكورة بانولو جوج كورات ويخطيها ويقول للرجل دحمو يا شلخ كا ودصيب الدماياث هوادا ادشرشر .حمو طاح وبقى ايزgي بالعاداو ، دارو بيه كاملين ، بغاو ينوضوه صابوه مقروط من رجلو ، عيط لاربيط على الاسعاف ، دخلو حاد الحمارة ولقاواه فوق البرداع وطلعو بيه للدار .
نخليو حمو فاش عطاه الله وإلى اللقاء في الحلقة القادمة بحول الله .
تحية مودة وتقدير للأخ محمد البوعلايي ضيف شرف هذه الحلقة ، وأستسمح على الإطالة .

توقيع: عزيز البورقادي

تصنيف : الثقافة التسولية,طرائف عمي بوشتة