هذ النهار كان طالع مخير عند عمي بوشتى،
صبح متكي حيت حمو حشم على عراضو وخرج البقرة درعى، وحادة صبحث حتى هي متكية حيث
وجدث الفطور البارح بزااف وبقا الخير موراها وقالث بلا ما نزيد نضيع الضيعة حرام،
نسخنو غي هذ الشي دي بقا مورانا ونفطرو والرحيم الله.
عمي بوشتى صبعو صبح زرق ومنفوخ ووصى عياد
يجيبلو مالسوق حد المرة دشي خروف يحشي صبعو فيها باش يروح دغيا.
المهم
كان طالع النهار مخير حتى جا حد الحيبور دولد عياد وصاب عمي بوشتى جالس مور الدار
وخدام أيخبش فحد التيريفو جابو معه من فاس شراهلو أشرف دبوجمعة كادو، المهم بقا أيشوف
داك التصاور ديالو فالملعب وفالعرس وأيوري لداك الحيبور شي فيديوهات مناين كان
أيتبورض الركادة والنسا دايرين به وهو مصغب عليهم قرقور الذكر، الحاصول وما فالدين
داك الشي عجب الطفل وطلب من عمي بوشتى يعطيه التلفون يتفرج حتى هو، الراجل ما بغاش
يطيرا لو عطاه المشقوف وداك الحيبور غي شدو ويقبطا بجرية وحدة للدار، عمي بوشتى ما
صاب باش تبلى ناض تابعو ولايني فاين ماشي يشدو وهو عطشان ومقطوع وركابيه خاويين،
الدري قرب يوصل للدار وهو يطيحلو التلفون من يدو فالطريق وما جا يهزو حتى كان
البغل دعلال زطم فيه ويقلو يا تشختش، عمي بوشتى بقا واقف مصنكر كلشي مشى، النوامر
والصور والفيديوهات وما بقا لو تا حاجة.
هز داك القجاقل فيداه رجع للدار شافثو
حادة وبقاث أدفرى بالطحك.
حادة: ألله على راحة، شهاتي بها الله يا
تهنيا وراحة، حتى نتينا كنت أدقيل قابط داك المشقوف وأتفرج فيه دقول غي نتي دي
عندك الكورطابل.
عمي بوشتى: الله دريح فجهنم ونتهنى منك يا
هذ المبهدلة، جاثك على قلبك؟ ولايني علي باليمين فاش يجي داك بوسرابط دعياد مالسوق
يا غيلا فضحتو وما نطلق منو حتى يشري لي تيريفو بحالو.
حادة: تراك دندب عياد صاب باش يتسوق بعدا
بقا غا يشريلك الكورطابل، البركة فراسك أوليدي، إيوا سر للعين سقي لنا شي قراعي
دالما باش نفطرو، والله يا ضايع فيك حد الgرااب مخير.
بوشتى: كاين شي gرراب قد باباك أبنت الساعي لاخر.
حادة: أويلي وكا ما يطحك معك حد، سر سر
غيب من كمارثي.
عمي بوشتى: زعما ما صيبت فيواخ دطحك؟ الله
دطحك بهم رايبين؟ أنا أنقلك التيريفو مشى لي ونتي خدامة أدفرنس علي هنا.
المهم ما عندي ما نقلكم وصافي، الله يخلف
على عمي بوشتى الحقيقي وصافي راه بقا بلا تيريفو، شوفو كيفاش دجمعولو شي بركة باش
يشري شي كورطابل جديد أنا مزااااوك ألحبايب راه الله كريم. ههههههه
وعلى المودة نلتقي.
مع خالص الود ويانع الورد، ورمضان سعيد.
توقيع: أحمد لزعر التسولي.
