عمي بوشتى والضياف ديالو تعوفو وسالاو والصافية ناضت جمعت الطبلة وهزت الصينية وصلاتا للبيت . عمي بوشتى يالاه بغى يجبد القابسة دكازا والتيليفون ديالو سرسر .
بوشتى : ألو . ألو شكون معاي ؟
طن طنن طننن طنننن
حادة : شكو دي لاغا ؟
بوشتى : ما نعرف . انا انهضر وانسمع غي التوتويت
السعدية : هداك الباطري خوالك أبوشتى خاصك تشارجيه .
بوشتى : كا دغيا ايخوا هاد المصيبة ياك عاد شارجيتو غي نهار عرفة
أشرف : تتهضر بزاف أعمي بوشتى . الريزو شادها غير انت باحدك ههههههه
حادة : ايوا لقيه فلاشارج لايكون شي وحيد عندو بيك الغاراض وباغي يهضر معاك
بوشتى : هاك . عبيه للصافية دلقيه فالشارجون .
حادة عبات التيليفون للصافية دشارجيه . الصافية قبطت التيليفون دباباها وحلاتو وزولت منو لاكارط ولقاتا فالتيليفون ديالا باش دهضر بيها مع عبد الحق حقاش هي ما عنداشاي االتعبقة و فداك الساعة دخل عبسلام وهي تفافات وردت لاكارط ديالا للتيليفون دباباها ولقاتو يتشارجا
عبسلام : شني ادلقي تما ؟
الصافية : والو غي كث انمسح التيليفون دباك صيبتو عامر بتانغدة ولقيتو يتشارجا
عبسلام : فيواخ مشي ينوضو هادو يمشيو عند عمي حميدة راهم ايعاينونا للعشا
الصافية : دابا وهوما ناضو غي صبر شواي
عبسلام : قلي أ الصافية ، جوج قوالب دالسكر مع داك السخرة دي تقضاتلي داك سهام من تازة كافية وقيلا أو نزيدو شي قالب ؟
الصافية : اويلي على جوج قوالب !!!! كا بغيت خالتي السعدية والحاجة منانة يشبعو علينا طحك
عبسلام : ايوا نمشي نزيد حاد الجوج خرين قبل لا يبلع ولد موحند دعامر
الصافية : ما يبلعشاي دابا العيد هدا أيبقى مقصر . نسيت نقلك جيب معاك حتى الحليب راه داك الجوج يطرو دي جيبت معاك البارح هي اللي طيبناها للضياف مع القهوة
عبسلام : وداك التمر هو هداك ولا قليل
الصافية : فاين بقى شي تمر ، صاط فيه داك المهيبط دحمو كامل باقي غي حا الحفن .
عبسلام : بليهوذي لاخور اللي طربو طربو على كرشو ، الصخط هاداك حاطي غي الصريط والفريط . ودابا لاش مشي نجيب هاد الحليب لاش
الصافية : شغلك هاداك اخاي
عبسلام : باقيشي دكة دالقهوة تما فداك البريق او نشفتوه ؟
الصافية : راها ثما حا السكفة . نسخنالك ؟
عبسلام : سخنا نكميو بعدا حا الكارو عاد نمشي للحانوت
عبسلام نزل التيليفون ديالو يتشارجا حدا التيليفون دعمي بوشتى وشعل الكارو وكب الدكة دالقهوة وكمى على خاطرو ومناين ناض خطى على التيليفون ديالو ورفد دباباه حقاش ايشابهو ولقاه فجيبو وخرج .
دابا التيليفون دعمي بوشتى عند عبسلام وفيه لاكارط دالصافية والتيليفون دعبسلام هو دي مشي يهزو عمي بوشتى ولاكارط دعمي بوشتى عند الصافية فالتيليفون ديالا .
غي هو خرج الصافية جبدت التيليفون ديالا ولاغات على عبد الحق
الصافية : الو
عبد الحق : الو عمي بوشتى
الصافية : لواه عمك الحوسين . كا ما ادعرفشاي صوتي كا شني ؟
عبد الحق : موشاي نمرتك هادي باش لاغيتلي هادي ياك النمرة دعمي بوشتى .
الصافية : ايوا راه تسالاتلي التعبئة . وانتينا ما صيفتليشاي باش نهضر معاك
هي هايتاك وحادة دخلت كا وهي قطعت وزولت التيليفون من يداها ونزلاتو فوق الرفدة دالروف
حادة : معامن كث ادهضر ؟
الصافية : غي مع غزلان بنت خالتي كنت انعيد عليها
حادة : باقيشي شواي من داك الكحول دي جبت معايا من فاس ؟
الصافية : لاش ادسقصي ايما على الكحول سيري غي عند ختك راها جايبا معاها القوام كامل
حادة : وفاي مشى عبسلام
الصافية : مشى يزيد السكر داك الشي دي جاب قليل
بوشتى : اشوف أ المرا داك الكورطاب ايلا تشارجا جيبولي و نوضو وجدو راسكوم نمشيو عند الناس راحنا زهزينا بزاف .
جابتلو دادا حادة التيليفون ديالو . غي هو قبطو وميلود لاغا لعبسلام . واجبو عمي بوشتى :
ميلود : ألو . أفاينك المسخوط فين راك موضر ؟
عمي بوشتى : كاين شي مسخوط قدك يا قليل الحيا الله ينعل التاصيلا دباباك يا ولد الحرام
ميلود سمع الصوت دعمي بوشتى وهو يقطع . عمي بوشتى ما فهم والو
هو هايثاك ويامنة لاغات لعبسلام :
يامنة : ياك باقي فكلمتك . مشي دجي هاد النهار دخطبني ياك ؟
عمي بوشتى : شني ادقول أ بنت ليهوذي لاخور . الله ينزل على باباك المسخ يا الممسوخة . يانا نجي نخطبك ؟ والله يا هداك ما بقى خاصني
حادة : شكون هادي دي لاغاتلك
عمي بوشتى : شي طفلة ادتملغ قلك كا ما دجيشاي دخطبني
حادة : انتينا هاد النهار ما عاجبنيشاي ابوشتى .
بوشتى : ولياه انا فيواخ عجبتك من نهار تزوجنا
حادة : ايوا بحينا قلتي حقا التيريفو خوا ، من بعد حتى صيبناك ادسب ودعرق ما عرفناك معامن ، دابا حقا ما حقا شي طفلة ادقلك كا ما دجيشاي دخطبني.....شكون هاد الطفلة ؟
بوشتى : كا دزول من قدامي يا القميقم دموكا كا راني نصوط فيك بهاد المعكاف
حادة خافت عمي بوشتى يلقيها بالصح وحشمت حدا الضياف وكحزت و بقات غي ادحمر فيه بعيناها وعيطت على السعدية ومنانة باش يمشيو يبدلو حوايجم . ناضو تبعوها ودخلو كاملين للسطيحة فاي منزلين الصيكان ديالم ، حادة لبست داك القميص الحميصي دي عطاتا ختا ففاس ولقات شواي دالسواك و شواي دالكحول فعيناها و لبست جلابتا اللتشينية . وبغات دلقي الفولارا وما صابتشاي باش تشدا وهي دقول للصافية دعيط على عبسلام يجيبلا معاه الفناتي من الحانوت
الصافية : ايما يانا ما عنديشاي التعبئة قولا لخالتي دلاغيلو .
السعدية رفذت التيليفون ديالا ولقات النمرة دعبسلام .
السعدية : ألو . كا هدا مولاي السلطان الغزال
بوشتى : هدا مولاي الباكور والله يا بنت الخانزة لخرا و عاودت لاغيت لهاد النمرة ياغيلا كث غدا عند القايد
هوما هايثاك وعبسلام جا وعطاهم السخرة دي جاب عملاتا حادة فحاد الصاك هي و شي طروفا داللحم و حاد البتيخة وحاد الربعة كيلو دالعينب كان جابم معاه من السوق نهار عرفة .
عبسلام مشى بالخف للغرفة و سيرا السباط ولبس الكونبلي ديالو والقميدجة البيطة و لقى شواي دالدهنة لشعرو و خرج . ايتلاقى مع عمي بوشتى فاصافاص
بوشتى : لاين ماشي انتينا أهاد الشبيشب دالقوبع ؟
عبسلام : ماشي معاكوم
عبسلام : لاين ماشي معانا كا حول كا شني نتي . كا التسول ايعبيو العريس فالخطابة يا هاد المزحول .
بوجمعة : هاد الشي اللي ولا دابا ابوشتى ضروري خاصو يمشي معانا باش يشوفوه حباب العروسة .
بوشتى : يا والله لثما لا عتب . مزيان تبارك الله هاداك ما بقى خاصنا غي نلقيو شغل المدينة ونعبيو معانا العريس يخطب . زعما داك بوشلاغم دحميدة ومراتو ما ايعرفوشاي عبسلام . ما عياشاي يسرقلم الدجاج وبيبي من حدا العتبة دالباب .
عبسلام فهم راسو وسمح فيهم وزاد و هز التيليفون وعيط ليامنة يقولا ما ماجيشاي معاهم ، شداتو غي العلبة الصوتية . هو هايثاك وعبد الحق لاغا للصافية كيواجبو عبسلام :
عبد الحق : هاني مشي نصافطلك التعبئة غي ما تقلقيش عليا ولا دعبيشاي عليا راني غي نسيث واها
عبسلام : الو شكون معايا
عبد الحق سمع الصوت ديال الراجل وهو يدخلو الشك وقطع......اويلي شكون هادا دي واجبني ؟ جابلي الله الصوت دعبسلام . ارا نلاغيلو فنمرتو نشوف علاش الصافية ما بغاتشاي دواجبني
صونا عبد الحق على عبسلام وهو يجاوبو عمي بوشتى :
عبد الحق : ألو عبسلام
بوشتى : لواه قدور هدا . زيدني عاود حتى نتينا زيدني
عبد الحق سمع الصوت دعمي بوشتى وما فهم حتى لعبة بقى غي ايبني ويريب
عمي بوشتى ناض حتى هو لبس جلابتو وداك الصباط القهوي ولقى الرزة ديالو وهز البريكة والقابسة دالسيكار و ركب مع بوجمعة فالكاطكاط ديالو وركبت معاهم السعدية وحادة . فوزي ركب معاه مراتو واشرف . ولقاو امارش للطونوبيلات وزادو مع لابيست .
يامنة جات صابت عبسلام عيطلا بالنمرة دالصافية . ما عرفتش داك النمرة قالت يمكن عبسلام عندو جوج نماري وهي تعاود تصوني على عبسلام وكايواجبا عمي بوشتى وهو راكب فالطونوبيل
يامنة : واش صونيتي عليا عاد دابا
بوشتى : يا ودي يا هاد المصيبة ما بغيتشاي دعطيني التيساع . الله ينعل التاصيلة دليهوذية يماك يا بنت العوجة
حادة : ايوا بحينا مناين قلتلك شكو هادي دي ادهضر معاك ما عجباتكشاي هضرتي ونهطت فيا . قلي نتينا لاقي خيربي دالمعارف ياك ابوشتى
بوشتى : يا ودي هنينا يا هاد الفا دالمجرة . كا دسكت كا راني نريبلك هاد جوج نيابر دي باقيينلك
السعدية : بعد المرات كيوقع الغالاط أ ختي . انا عاد قبيلة بغيت نعيط على عبسلام واقيلا غلطت فالنمرة وجاوبني واحد الكارتة ، واحد الجلاخة ما نقلكش انا حشمت فبلاصتو .
بوجمعة شاف القضية مشي تحماط وهو يشعل الموسيقى وبقاو ماشيين ساكثين وايتصنتو للعلوة حتى وصلو للدار دحميدة . هما للباب وعمي امحمد وخاه احمد ودادا عيشة للباب عاد اينزلو من فوق البغلة حاد الصاك عامر بالسكر والتقضية وماجيين يخطبو لعبقادر ابنم .
نخليو الخطاب مشي يدخلو للدار دحميدة باباين يامنة والى اللقاء في الحلقة المقبلة بحول الله.
توقيع: عزيز البورقادي
0 commentaires:
Enregistrer un commentaire