الهجاء بالأسماء عند بني تسول

السلام عليكم ورحمة الله وبركاته

أمسية سعيدة للجميع

قاموسنا التولي ديما ربيع
نبحثو ونقلبو ونشاركو جميع

هادو يا اسيادي مجموعة اسماء
كل سمية عندا دعوة من الاف للياء
وهاد الموضوع سبق وهدر عليه سي احمد أحمد لزعر التسولي انقول لراسي وااااء
ولكن راسي ايبقى يعبي ويجيب فالهواء
حنا خوت فالسراء والضراء
ولكن الدعاوي عندنا اكثر من الوباء
وعلى حساب السميات كيف ما الحظ شاء

احمد : دحمل الفرارح
قدور : يقدرو عليك
خديجة : يخدجولك
الصافيا : دصفا منك
رقية : يرقاقولك المفاصل
ادريس : درس الشوك
علي : يعلويك للسما وينفطوك
سهام : ينقرط عليك السهم
فاطمة يفطيلك المخ ( هدي لي مبغاتش تفهملي). شني هي معنييتها وشني يقصدو بها
قاموسنا التولي ديما ربيع

توقيع: محمد البورقادي

اقرء المزيد

طفولة عمي بوشتى الحلقة 11

باسم الله نبدا لكلام وصل والسلام على حبيبنا الهمام سدي رسول الله شفيعنا يوم نلقاه.

عاشرت من الرجال كثير وبحال عمي بوشتى مالو مثيل .
وخا كيزبلها بزاف ولايني اعليه مانخاف .
من حيث مرضي الوالدين واعزيز اعليه الدين .نطلبوا من الله يحسن لينا وليه الخاتمة.
عمي بوشتى القهوة كحلة ما عندو معاها فراق واعزيزة أعليه وكتجيه لذيذة فلمذاق.
حادة كاتبغي لحليب ولايني ما عندشاي الزغبية لا بقرة ولا معزة فالزريب .
رغبت بوشتى يدبر اعليها عما قريب . قلا جبدي داك لكميمسة من تحت السرير ونزيدك اعليها فلوس الزيث ونشوفو واش دشري لينا شي معزة وما لهروية ما شفتلكشاي .قالثلو والى كملت ليك دمشي دشريها قال أوا اهناشي منك آازغوذا ديالي لهلا يخطيك اعلي ناضث اتزحول دخلث لروا دالتبن جبدث رزمة مرزمة وقالثلو هاك آزماني .
حسبا وعملا فجيبو وقلا مناين جاثك لفوس آالزبلا.غطبث وقالثو انا الزبلا دوريثالك رجعلي ديالي قلا والله لاشفتا.قلي مناين جبتا. قالثو جمعتا من عند اختي وولادي ومانت كعولت اعليك منعرف حتى نحسبا.
قلا صافي آموكا ديالي الله يخليك ليلي نوض دنعسي وغدا الطلاثا نتسوق وادا اميل .
اصبح مع النبوري منوض حمو يرافگو ومشى للسوق صاب السوق خرف ولي شرا شرا ولي باع باع مشى للقهوة يرتاح وكما يتلاقا الناس لملاح. ما كيصيب غير سي محمد بومعگاف جا من الرباط قاصد لبلاد.اوا منقلكمشاي الفرحة ديالم يعلم بها الله تعانقو وتسالمو وهو يسقصيه مالك أصبحت هنا فنبوري آعمي بوشتى قلو جيث نشري شي بقرة ساعة هاد الناس ايبيعوهم بالليل باش يحشيوها لغشيم. وانا خصني نشري بالنهار باش نختار.
قلو الشريف كون هاني غدا لاربع ماشي نعيط على واحد صاحبي يتلاقانا تماك رآه كاين خوه وبني عمو يشوفوا لينا شي حاجة مزيانا.صونا لي التليفون بأن لي اشريف .آلو السلام عليكم الشريف لحبيب .
الشريف: سي دريس كيف راك عامل مزيان فاين راك.
انا :هانا فتازة آالشريف ياك لاباس.
الشريف :امزية انا راني فواد امليل. ومعايا عمي بوشتى باغي شي بقرة مزيانة الى كنت ادعرف شي حد فلاربع يدبر اعليه نتلاقاوا غدا فالسوق.
انا:اولاش حتى لغدا كانا ماشي نصبر اعليكم حتى لغدا.دابا نتلاقاوا لبيرو دبني لنت وعمي بوشتى مايكون غير على خاطرو الى بغا حتى ددحلبا ندبروا ليه فيها .
نخليكم هنا على مانوصل انا من تازة للبيرو ويجي الشريف من واد امليل ونتلاقاوا لاربع ونكملو الحجاية استودعكم الله الذي لا تضيع ودائعه.

توقيع: أبو إلياس الأشهب

اقرء المزيد

عمي بوشتى وذكريات الطفولة 10

عمي بوشتى ودادة حادة والصافية وحمو مجموعين على الطبلة وايتعشاو و حمو بدا يهضر :

حمو : حقا ابا عمي الحوسين راه عباواه هاد النهار للطبيب ما نعرف مالو
بوشتى : كا الفقير الحوسين ؟
حمو : واه ابا ، رفذو محمادين مول السيكانز فالصباح على القيتي وعباه لتازة
بوشتى : تيمن طبيب لاين عباواه كا للبلدية كا للكنينيك ؟
حادة : وعندو هو بعدا باش يمشي للكنينيك ؟
حمو : لا عباواه للبلدية ، قلي سعيد ولدو سلاط عليه شي حريق بايت الليل كامل يلاهط وفالصباح عيطنا لمحمادين طلعو للطبيب ولقاولو الترفزة والسكانين وهودوه بالزرب للموطع فاين ايلقيو العملية
الصافية : مسكين عمي الحوسين هداك مايكون غي الفتق زير عليه
بوشتى : ايوا بعدا لاباس مناين صغب الراميل داك النهار بعدا ينقام عليه الشغل رخيص
حادة : ايوا حتى هو الراجل قلو الطبيب بعد من تمارة انتينا عندك الفتق ومصارنك فالثين وهو خدم بيداه الصيف كاملة ما قدشي يلقي الخداما أ حاي بنادم شحال فيه دالتمقشيش ما ايقدشي يطلق الفلوس كككل حتى ادجرى فيه
بوشتى : ويانا عاد كث انا والفقيه حدا الدجامع ما قليشاي
حمو : يمكن ما فراسو ما.......اح اح اح
حادة : ارا الما ارا الما خاك ايجيف اطفلة خاك ايجيف !!
حمو كان اياكل ويهضر وهي دسيخلو حاد الحبة دالعدس وبقى غي ايشهق و عيناه كانو مشي يفلتو و صفار حتى ما بقاتشي قطرة دالدم ادور فوجاه
الصافية ناضت بالزرب عمرت الغراف وجابتولو وحادة درزت لقاتلو الغراف ففاه وبدات اضربلو بين كتافو وعلى طهرو والسيد عاد رجعت فيه الروح
بوشتى : كا نتينا الحلوف كا بنادم اويلي وعلى زندوح مربي يانا
حادة : كا الدري كان قريب يمشيلي وانتينا زايدو بالمعيور
الصافية : ايوا غي ساختلو ابابا كا زعما نتينا عمرا ما وقعتلك
بوشتى : وقعلي العجب المحندب أ بنتي غي لا دفكرنيشي خليني ساكث
حادة : هو ايعجبو ينgر غي علينا حنا اما هو ما كا دي ينgر عليه
الصافية : صافي ايوا تهناو ونتوما ديما قاشعينو . يالاه ابابا عاودلي اشني وقعلك الله يرحم جدي الحاج حمو باينة هادي شي غريبة من الغرايب ديالك اللي كتبو عليهم الدراري فالمجموعة
بوشتى : اودي ابنتي باباك وقعلو البهتان د الغرايب شحال قدني نتفكر
الصافية : ايوا عاودنا شني وقعلك راه داك عزيز البورقادي ما دجي نتي دكمل المعاودة حتى يكون كتب هاد القصة ونزلا فالمجموعة للناس باش دقراها
بوشتى : كا داك الشريف لاخور دي كتب عليا مناين مشينا لفاس ؟
الصافية : هاداك أبابا هاداك . حتى هو دقول عايش معانا ما عاث مناين ايسوقنا الخبار . المهم دابا عاودنا شني طرالك راه بانلي داخل للفيسبوك وطالق ودناه
بوشتى : وباش عرفتو نتينا داخل للحيسبوك وطالق ودناه كا هو قالالك ؟
الصافية : لا أ با ، شوف هافاين شوف ، مناين ادكون داك النقيطة زريرقة تحت التصويرة ديال شي حد انعرفوه راه مكونيكطي وفاتح الفيسبوك
بوشتى : والله ايلا هو بشلاغمو ، دابا راه ايصنث علينا او شني ؟
الصافية : ما نعرف مناين ايجيب لخبار المهم نتينا عاودنا وهو دابا يتكلف
بوشتى : ايوا العجب هدا وخلاص . يالاه سمع اسي البورقادي . حاد النهار كث باقي صغير نقلك حضاش نقلك خمسطاش لعام و كان الصيف وبابا لاقي توازة وايدرس الشعير . ويانا حتى سلاط عليا شي حريق فقلبي دليمن (كرشي) بديت غي انعرعر ناض بابا جا ايسبك وعباني للطبيب دالبلدية فتازة وgوزلي وصابو عندي قلك المصرانة الزايدة ولقاولي الباراسيو وزولوهالي
حادة : ايييه كا دابا عاد ادقولا . دابا يانا عبيتك بلا مصرانة الزايدة ؟
الصافية : هاديك المصرانة الزايدة ما عنداشاي شي دور أ يما موشاي بحال المصارن لخرين . سكت ايما الله يهديك خليه يكمل
بوشتى : لقالي الطبيب الباراسيو و خيطلي كرشي مزيان وقلي حطي مع الغراز لايمشيو يتفسخولك وقال لبابا خصو شواي دالراحة و حطيو معاه ما يبقاشي ياكل حتى يوهنا ويتنفخ راهم يتحلولو الغراز خاصو يلقي الريجين باش اللحم ينجمعلو وما يطرطقولوش لغراز
ايوا رجعت للدار ولقاو عليا الحصار كلشي حاطي . بابا من جيه ويما و خوثي من جيه والجيران من جيه وحتى الفلاحة دي كانو ايخدمو مع بابا حاطييني غي يشوفوني لقيت شي شدق ففاي ايقولولي باراكا عليك مشي دنبزل .
حاد النهار الفلاحا كانو فالنادر وجابولم الفطور شي مفروق دلاسايا تبارك الله داكل عليه يدك كلاو الناس حتى شبعو وكليت معاهم حاد الشدق وما خلاونيش نزيد وعيطو على يامنة ختي قالولا عبي هادشي دبقا للدار يلا بقا هنايا مشي يسوط فيه هاد بومليلس حتى نصيبوه تفلق . عبات ختي داك المفروق وجابتنا حاد الميدونة دالكرموس غي الورناكسية المشرطة ادشهي خلاوني كليث غي جوج كرموصاث وزولولي الميدونة من قدامي لقاوها فالضل دالزيتونة حداهم باش ما نصيب مناين نgوزلا وناضو يكملو الدراس
جيت انا بقى بالي مع داك الكرموس كا ويانا ندرز حيث الواد فاين الجنان ديانا وبقيت انشعلق فالشجر ونزول ونلقي ففاي بالحليب ديالا بكلش حتى حسيت براسي وهنتا وكرشي تنفخت و ما قديتش نزيد وبديت انقنتل ويانا دجي لبالي حا الفكرة قلت نلقي شواي دالرياضة باش كرشي دهزل
الصافية : ايوا ؟
بوشتى : ايوا نوضت بديت انشعلق فحاد العطش دالشجرة باش نلقي شقلايبة وينقسم داك العطش ونجي يانا وياه فاااط فلرط ، جيت منفوط على كرشي ونقول لداك الغراز يا زردع ونطلق غي زgوة وحدة حتى سمعوني من النادر وجاو ليلي صابو الدمايات هواذا على كرشي ويانا قالب الجنان بالزgا ومصارني قرابين يفلثو .
مناين زولولي العبايا وعراوني صابو داك الغراز كاملين مطرطقين ما بقات حتى وحدة وهزوني على البغل وعباوني للبيرو شافني حاد الفرملي صاب الغراز محلولين وقال لبابا دابا عبيه للبلدية ايوا وعباوني عاوث عاودولي الباراسيو من جديد ولقالي الدوا وردوني للدار شهر ويانا غي ناعس و لاقي الريجين حتى طحيت بحا الهراوة دالفاس
الصافية : معضورك الكرموس ادشعل عليها الضو واخا كانت مشي دخرج عليك و انا انقول خاي حمو ليمن شبا ساعة شبا فيك أ با
بوشتى : يالاهو نوضو دابا دنعسو باش غدا نمشيو نرgبو على داك المتعوس دالحوسين و نرجعو باش نلاقي داك ادريس الاشهب ابوالياس الاشهب راه هضر معايا فالتيريفو وقلي لاقيني غدا لبني لنت نشربو شي قهوة ونتهاودو حا الشواي .
المهم الغرايب دعمي بوشتى ما يتسالاوش ونشوفو السي ادريس شني مشي يعاودلينا فالحلقة الماجية .
طبتم وطابت اوقاتكم بكل خير ودامت لكم البسمة

توقيع: عزيز البورقادي

اقرء المزيد

حمو والرياضة

السلااااااااام عليكم

شخباركم لباس عليكم كي لاقيين تحية وسلام للحباب ولصحاب لي يبغينا ولي ميبغيناش
لي بغانا مرحبا به ولي مبغناش ربي يهديه.
حمو كان فلحد وطلع للدار ايسبg تلاقاه عمي بوشتى وقالو: آمالك اوليدي كالح وماجي أدسوط شكو دا يجري عليك
حمو: خير أبابا.وحبلو يدو وراسو.
عمي بوشتى :ايهاي هاي على الصواب طاح عليك ياك شحال من نهار ادgوز مدرم فيا ودgوز نيشان لعند يماك ادور على ما دحنجر
حمو :أبابا ياك نتينا أدعايرنا ودقولنا ما انحبولكشاي يدك.
عمي بوشتى :غا ادهدر ألمسربط. قول شني عندك راني أنعرفك. طلق.
حمو: والو أبابا غا بغيت نقلك بغيت نطلع لتازة نشري شي حويجات.
عمي بوشتى :وشني ظهرلك دشري أسيطوط لمسيطط ياك عندك لحوايج غامسيبين فالطارما
حمو :أبابا يانا بغيت باش نشري شي حوايج د الرياضة حد السبردينة وحا شورط وحد لكيطمة
عمي بوشتى :اه اشني ولاش اوليدي هد شي كلو؟
حمو:أبابا كنت فلحد وgوزت للجمعية دفيها صحابك وراهم ايسلمو عليك كاملين وراهم مشي ينضمو حد السباق على الطريق
عمي بوشتى :واش هديك لجمعية د فاق
حمو طحك وهو يقولو: أبابا راها سميتا جمعية الأفاق مشي فاق
عمي بوشتى:أييه اولدي راني عرفتا وشني طالبين؟
حمو مطالبين والو ابابا قالك الشباب د لقبيلة كاملا عندم الحق يشاركو ومن كل دوار وجماعة لي يبغا يشارك يتقيد ويجيب لحوايج د الرياضة وتيانا بغيت نشارك وراني تقيدت
عمي بوشتى : أيهاي هاي على حمو ولد بوشتى دحمو ماشي يطحى يجري بحا هشام الكروج و اعويطة ويجيب لمداية د الذهب
حمو:اوا أبابا مالا.. خليني نجرب ويحن الله يانا بغيت غانشارك واها
عمي بوشتى : واخا اوليدي تفهدي منقلكشي لا وتنمشي معاك ونشريلك دببغيت باش ميطحكوشي عليك ومنتما نمشي نشوف داك صحابي د لجمعية ونسقسيهم شني عندم من جديد راها قريبا عام هادي باش كانو لقاو داك لخطوط فلمنجورة وجابو جدارمية ولقاو حد لمسرحية على السلامة د الطريق وكنت حضرت معاهم وgوزت حد النهار من داكشي.
نخليو عمي بوشتى يمشي للجمعية ويانا نعاين التعاليق ديالكم وفلمنجورة نتسابقو.

توقيع: محمد البورقادي

اقرء المزيد

أخلاق التسول

السلام عليكم كاملين مانفضلو شي على شي

 كيف اصحاب الرزز كيف صحاب شواشي 

 كيف لي راسو عريان بلاشي

 اخوتي جيت نقولكم شي كلام وها انا ماشي
التسول ارض الرجالة ما جامعا من الوالا
الطبيعة صوت وصورة ها واد الحظر وها ولاد زباير ها الربع الفوقي وها بني مقورة
جبال ووطى عقبة وحدورة
سبحان الله دشوفها العين دبقا مبهورة
وخرجو منها الفقها وداكترة واساسذة وعلماء فدول مشهورة
الناس فيها شي يوقف معاشي تبارك الله بحال النحل
الظحك وتقشاب ديما وماشي عيب فيها
اما الزين والحشمة ماتسولونيش عليها
والاخلاق والترابي سولو كل الناس عليها
وناسها الحيين ماينساو لي ماتو
ودلباس عليه فيها ماينسى الفقير ووليداتو
حيت بلادو التسول وعلى هاد الطريقة رباتو اخوتي غير قبلو عليا ولادقولوشاي هدا زاد فيه
انا قلت غادانا عشتو وعيني قشعاتو ومرحبا بالضياف كيف البراني كيف الدخلاني كيف غير لي طريق دوزاتو
تحياتي ومودتي للجميع وقبلو على ماوجد ههه.

توقيع: زكؤياء موسى

اقرء المزيد

طرائف عمي بوشتى

السلام عليكم يا مجمع الكرام 
عمي بوشتى مشى صلى المغرب فجامع وجا للدار ايقفقف بالبرد غي وصل لباب الدار وسهال ايعيط
بوشتى. اااا الصافية الصافيا افاينك اطفلا
الصافية. هانا ابابا فصطيحة شني ايخاصك 
بوشتى. كلشي ايخصني 
الصافيا. لواه ابابا من حدي معاك حتى حاجة ما دخصك
بوشتى. ايييه من حدك احداي .. راني انفكر كيف ماشي يكونلي نهار دمشي لدارك
الصافية حشمث واحناث راسا قداما وقالت فنفسا فقاش يجي داك النهار
بوشتى. ما عندك لاش دحشم ابنتي هذي هي الدنيا اجي ابنتي شعلي داك الطرفازة وسير عمرلي حالكاس دالقهوة نسخن بيه مسارني
الصافية. فاش ماشي تفرج دابا ابابا الخطبة حتى لتمنية ونص
بوشتى. شني ماشي يخطبو عليا راهم فضحونا غي الحمى القرعية للبقر وداك وين وان للبشر.هاذ الليلة راهم ماشي يبينو حاد اطفل من الحد فترفازة مشارك فسبانباط اسمعتم ايهضرو عليه فجامع
شوفلك إو على مو سربوب انا انهضر معاها وهي غي ادفرنس
الصافيا. البرنامج سميتو سداند اب وهذاك الدري اسميتو ادم بلحاج
بوشتى. ونتي فاين ادعرفو
الصافيا. راهم كوزوه داااك النهار دالسبت وراه انجح نتينا كنت معروض فطغص عند عياد
بوشتى. التسول راهم بلاواث وخلاص فاين ما مشاو ايلقيو بلاصتم .. فاينهيا يماك
الصافيا. راها ادوجد حاذ بوشيارة
بوشتى. هاذا ما لقاث مزيان فزمانا سير سير عمر القهوة واجي دغيا.

توقيع: ندى بيلا

اقرء المزيد

تولية طولانطية

هذا واحد العطار جبلي جا أيدور فالدوار وقت الكرموس وصل لحد الدار وخرجتلو طاطا العلامية الله يتولاها برحمتو صحن دالكرموس وزميثة حطاثالو وبقا غي أيشوف فيها وبغا يتريگل عليها قالا وريني كيف أدعملو دكلو هذي الله يرحم الوالدين( مع العلم أن جبالة من أهم المناطق انتاجا للكرموس) ، إوا وتگلسلك طاطا العلامية وبقاث على داك الكرموس وحدة فعنقا وحدة ففاها ووحدة فيدا أدمرغ فزميثا وداكل حتى كملتلو داك الصحن وقالتلو إوا هيثا أيعملولا ، قالا إوا جبلي حشويش الله يخليك ، قالثلو إوا باركا عليك هاد المرة غي تعلم والمرة الماجة عاد كول وخلاثو غي حال فاه وأيشوف. وتحية للمرأة التولية.

توقيع: أنوار زياد

اقرء المزيد

طرائف عمي بوشتى

باسم الله نبدا لكلام وعلى نبينا نصليوا بالدوام .
الحادگة ما تحتاج معاها كلام.
والمعگازة ما ينفع معاها سبان.
الحادگة تبان حداگتها فالطعام .والفنيانة تقثلك غير بالهم.الى اعطاك العاطي لاتحرث لا تواطي. بحال محمد البورقادي.
ناض الفروج يا سيادي ينادي كيف ديما ما تحتاج معاه اصريمة من حيث مأصل واشغالو قايم بيه. صاب عمي بوشتى سبقو هاد الليلة من حيث معول يسافر للمدينة.ودادة حادة كيف العادة وجداث القهوة دشم ريحثا من الحجرة لكحلة والى ماتيقتوني سقصيوا علال والشريف يحلف وسهام دقول آمين.افطر عمي بوشتى ولبس السروال لبيط بالتكة وارمى على كتافو اجلابة لمخطة.وقال لحادة انا ماشي لمدينة نقضي شي صخرة وانتي نوضي حمو يخرج داك النعجاث يضحيوا ويطول داك الهروية حذا الناذر ومينسشاي داك لمشخار يرميلو واحد اللهوة دالتبن .ردث اعليه حادة حمو مريط رآه البارح قلك راسو كيحرقو .
عمي بوشتى : زول من قدامي ياوجه موكة صبحنا على الله .حمو وا حمو آنوض اداك لحلاسة.
حمو: آه آآآه راني مربط آبابا .
حادة: آميمتي على وليدي عنداك يكون جاه داك المرط دقالو اعليه فالطرفازة .
عمي بوشتى: كيلاقي هاد المرط عاوث.كل نهار اجيبولي شي حاجة اجديدة من هاد المشقوف والله كمكان ايفكري فشي ناس اعزاز وشي ذكريات مزيانة غلا شقفت بوه
حمو:ايقلولو هايش وان
عمي بوشتى:كينشي هيش قدك ابل الضبع لاخور.
نوض تگعد من تماك وسير لتحت العين جيب شي درع دفليو طيبولك يماك مع التيشة وشوف شي كاغيط دالسكار واعمل فيه فليو وكميه وبقا ادبوخ منخنافرك.هاداك رآه قابطك غير المرط دالشمايث آالشماثة قلك الهايش وايش.
والقصة هنا وقفاث.
اوا راكم عارفين لخبار فراسكوم.

توقيع: أبو إلياس الأشهب

اقرء المزيد

طرائف دادة حادة

مساء الخير عليكم،،
أمنجانا يجبه الخير،،
أنا لي هي أنا فوزية هايثة أيلغيولي ،،
قنطت شواي فالمدينة أنظل غير ليل ونهار بين 4حيوط ، ماشي يسمعني سي ادريس قلت 4 يجبلو الله أنهدر على التعدد ههه،
الحاصول بغيت نبدل الجو ونيحي الرحيم مع حبابي وناسي فبلادي،
شديت الكار أخياتي ومشيث حتى وصلت لبلاد عند طاطا حليمة الجارة دادة حادة،
أنا تميث ماشية فالعقبة وأنا نݣلس ،واحدشويش وقف حدايا واحد ااشيباني سقساني قالي مانيين أننتينا ،قلثو أنا من المدينة الحاج وهو يتبسم ويطحك ااشيباني عجبو الحال منين قثلو الحاج ، ويهو يقولي عندمن جايا قثلو جيت عند طاطا حليمة ، قالي مرحبا بيك ، واقيلة عييث فهاد العقبة أنتما ياها الناس دالمدينة دغية أيتحشو ليكم داك الركابي ، قلثلو إييه الحاج ، وهو يطحك ، وأنا دخلني الشك بالطحك ديالو ، المهم ركبني على البهيمة ديالو ووصلني حتى لباب الدار طاطا حليمة،
داق فباب طاطا حليمة ،
ودقول شكون،
قالها غبى أنا ؟
طاطا حليمة خرجت ،كا انت ؟
هانا وصلتلك هالضيفة جبرتا سخفانة فالطريق ،
طاطا حليمة، الله يكتر خيرك ،
وأنا أنبنسي مع راسي شكون هاد الرجل ؟
سلمت على طاطا حليمة ودخلت للغرفة دالضياف ، توحاشتك أطاطا بزاف وأنا نقول نجي ،( طاطا هي مراة عمي)
طاطا فين هو عمي توحشتو ،
طاطا حليمة ،، يودي عمك مشى لسوق ومزال مجا معات لياه تعطل،،
أنا إيوة الغايب حجتو معاه،
الشيبابي ،،
مشى لدارو ، من الباب وا حدا جدا هاو ،
دادة حادة ، أمالك ياراجل ؟
الشيباني طاطا حليمة جاو عندا شي ضياف من المدينة،
أودي شني ماشينقولك هاد الناس دالمدينة فنيانين طايحين من العين دالشواري،
دادة حادة ، وشكون هاد الناس؟
منعرف ، أنا سقسيثا قالت من المدينه ،
دادة حادة ، حتى مو العصر ونمشي عند طاطا حليمة،،
وأنا مزالة معرفت شكون هاد الشيباني هههه
وا حادة ،
وا نعم،
وأنتي قي لغدة وعيطلم يتغداو عندنا ، لاش ماشدمشي ،إلا تسعفني مدمشيش،
دادة حادة ، واخة اراجل،
المهم دازت داك ليلة زوينة عند طاطا حليمة وعمي،
فالصباح،
دادة حادة جايا عند طاطا حليمة ،
وا صباح الخير أحليمة كيف صبحت لباس ،قالولي عندك الضياف من المدينة ،
صباح الخير والربح أ حادة ، إيه ألحبيبة هادي فوزية بنت لوسي لي ساكنين فالمدينة ،
دادة حادة ، أه إيوة مرحبا بيها وناس المدينة،
أحليمة أيوة لطيبباش لغدة هاد النهار ، راكم ماتغداو عندي انتي وضيافك،
طاطا حليمة،، انشعاالله أحادة،
الحاصول الشيباني منين دخلت عندو وهو بسقسي فية،
شوية بدأ يجبد حس الزواج،
وأنا مع بالي كنقول ياكما هذا هو سي إدريس ابو الياس مول التعدد؟هههه
حشواي وهو يعطيلو عمي ، وا بوشتى نوض نمشيو نصليو فالجامع،،
وأنا يغلبني الطحك ههه، عمي بوشى ايبحلق فية،
وهو يقول لعمي ، هاد بنت خاك باينة ضرايفة مدعطيهاليشي ؟
والمحاين دالحوساين 😂😂
الحاج بوشتى وعقلو فاين،،
شد الطريق لسوق دالاثناين،،
بغى يعدد وحادة مصابثلو لاين،،
عمي بوشتى عينيه تحلو والكلام سي ادريس بدا يتصنتلو،
الحاصول هههه
غير قبلو عليا أول مرة نكتب قصة خيالية ،
وخة هي خالية من اللهجة التسولية ههه ولكن معليش شوية بشوية حتى نجيبها هي هاديك هي،،
تحياتي يا خياتي.

توقيع: فوزية المعلم

اقرء المزيد

الوشام

السلام عليكم ورحمة الله وبركاته

السقارة والهدانة ياك ما نعستو شحال فالمgانة؟ ماشي نشارك معاكم موضوع جاني على الgانة
شحال هادي كان عندنا لعبار و لقياس فالزين
العيناين كوحلين والحواجب مgرونين ولفا صغير والحناك حومرين
وخا هاد الشروط كاملين المرا ايزينا الوشام ما ايعرفو لا حلال ولاحرام والعروسة ايلقيولا الفال يوشمولا فيداها ووجاها
او عنقا ورجلاها
وكان الوشام يميز المرا المتزوجة
اما اللي ما فيها وشام باقيا ممزوجا
وهنا ماشي نقولكم حد المقطع دحاد الغناي غناه فالعرس دولد خالي كنت انا باقي صغير وعاقل عليه :
قال الغناي :
يا الطير الغادي بلغلي سلام
والى لقيت حبيبي قلو شي كلام اخويا نشكي لداك العزبة ما فيها وشام خلاتني فالقهرة نبكي فالمنام .. ... .......
ولي بغا يكمل ها لمراح
اما حاليا ولا الوشام موضة عند شي وحدين . العيادو بالله منم . ايقلعو القلب و ايطلعو قيدود ما دقدشي دشوف فيهم .
قبلو عليا وعلى المودة نلتقي.

توقيع: محمد البورقادي

اقرء المزيد

عمي بوشتى و الديك

حاد النهار كان الصيف و بنادم مسكين مفتون مع الفلاحة ايقيل فتامارة الكحلة من الخمسة دالصباح حتى للطناش د الليل .
عمي بوشتى وعياد قيالين فالنادر يدرسو القماح والشمش شاعلة والحرارة واصلة لشي سبعة وخمسين وعبسلام ايهز التوادل من تافة ويرميلم فالحالة دالنادر ومقابلم بالما مرة مرة ايمشي يعمرلم حاد البيدو ملوي فحاد الخنشة دالقنب فازكة بالما. وحدهوم ودادة حادة فالنوالة ايطيبو المطلوع وايوجدولم ما ياكلو ويجيبولم للنادر يعتقو بوحبل
حتى غابت الشمش وودنت المغرب عاد سالاو الدراس وروحو حاد الشواي تعوفو و مع كان شواي دالعوين دغيا ناضو صفاو داك القماح وبركوه ولقاواه فالخناشي ودخلوه للدار كا وتفارقو كلها مشى ينعس فدارو .
عمي بوشتى تمغط ولقى راسو على الوسادة ما كاملاشي دقيقة دالماكانة حتى بدا يشخر
حاد الشواي وحادة سمعت الدقان فالباب
طاق طاق طاق
حادة : بوشتى أبوشتى بوشتى
بوشتى : آه (ما عرفتش نكتبا المهم راكوم عرفتوها كيفاش كتنطق)
حادة : الدقان فالباب نوض شوف شكون
بوشتى : نعس نعس راك وقيلا ادنوم شكو مشي يدق عليا فهاد النصاصا دالليل
طاق طاق طاق
حادة : أنوض أ الراجل الدقان فالباب كا ما ادسمعشاي
ناض عمي بوشتى ايدودح دور على البلغة صاب غي فردة ، الفردة لخرا كان ايلعب بيها المجحوم ماعاث فاين رماها ، لبسا فرجل ولقى الصندلة دحادة فالرجل لخرا حيت بيناتم غي جوج نماري حتى حادة عندا شي فراكح تبارك الله قاد الرزامة ، وهز لاتريك شعلا وخرج .
فتح عمي بوشتى الباب وهو يجبر المقدم واقف فالباب .
بوشتى : أهلل المقدم . أهلل . ياك لاباس ؟
المقدم : ما كاين باس أودي أ بوشتى غي كث فمكلسة معروض عند شي ناس و رايح لداري والدار مازالا بعيدة فبني عبد الله و الصباط ضبرني لبستو باقي دجديد ما خلاشاي فيا ورازي تسلخو بجوج وما قديتشاي نكمل حتى للدار وقلث نبات عندك نروح حتى للصباح عاد نكمل الطريق
حادة : أ شكون أبوشتى ؟
بوشتى : أ غي المقدم
حادة : أويلي ياك ما لاقي عاوث شي زبلة
بوشتى : يزبلو عليك البقار أ الفا دالمجرة . زيد زيد دخل أسي حميد زيد مرحبا بيك الدار دارك
بوشتى دخل المقدم للدار ومشى عند حادة
بوشتى : نهار نكون انهدر مع العباد فالباب ودبقى دلاغيلي نريبلك داك الفا . ايوا هاني فاي علمتك . يالاه نوض وجدنا ما ناكلو راه المقدم ضلام عليه الحال و مشي يباث عندنا هاد الليلة
حادة : يباث فالحبس بن المجوعف لاخور ما صاب فيواخ يجي حتى تناصص الليل
ناضت دادة حادة على سعدا ووعدا طيبتلم شواي دمطيشة و قلاتلم شي فليفلات وعمرت حاد البراد داتاي ونزلاتولم على الطبلة و رجعت فحالا دنعس .
عمي بوشتى : مرحبا بالمقدم ونهار كبير هدا وقبل علينا والله يا غي الموجود واها حتى الدجاج ما بقيناشي انعلامو حتى بروg . ها اللي قاصو بوقيبش ها اللي عباثو حلايمو بنت ليهوذية غي حاد الدجاجة عندا شي فليلسين ادجرم موراها هي دي باقية ادور .
المقدم : لا دقولشي هاد الهضرة أ بوشتى كا حنا ما انعرفوكشاي . هادي دار الخير والجود والكرم
بوشتى : زيد هاد الفليفلة الله يرحم الوالدين ما حراشاي بزاف
المقدم : الله يجعل البركة والله فيها ما حشمت
بوشتى : واقيلا نجيبلك شي قهيوة انتينا انعرفك عزيزة عليك القهوة ما ادخطيهاشاي
المقدم : مادا بينا أبوشتى الله يجيك الخير
ناض عمي بوشتى يجيب القهوة جبر دادة حادة شاخرة من داك العام . هي هاديك سخن القهوة و جابا وجا .
هوما هايثاك وحاد الدك دعياد ضربو حمار الليل ما عاث كيف وقعلو حتى نقز وجا فالمراح دبوشتى وبدا يصرخ ويطول فالصريخ ويعاود حسابو الفجر علم كا و عمي بوشتى و المقدم بقاو هدا ايشوف فهدا وعمي بوشتى جمدلو الما فالركابي ونشاتو العرق وحشم من المقدم وما صابشي ما يقول وبقا حال فاه ماعرف هاد لقضا مناين نزل عليه هما هيثاك وعياد حتى خلط عليهم ودق فالباب خرج عندو عمي بوشتى
بوشتى : هههههههه والله يا كث عارفك نتينا قبل ما نحل الباب
عياد : باش عرفتني ؟
بوشتى : انا نزلت القهوة فوق الطبلة ونتينا دجي لبالي . دخل دخل أ المهيبط دخل
دخل عياد جبر المقدم عند عمي بوشتى سلم عليه و كلس شرب معاهم القهوة وتم نايض
عياد : أودي سمحولي على هاد المجية فالنصاصات الليل انا غي سمعت حاد البالا دحاد الدك ديالي ايصرخ عندكوم فالمراح و جيت ليلو نعبيه
بوشتى : كا هاد المصيبة ديالك . ايوا دابا جيت جيت كلس قصر معانا شواي وعبي داك المسخوط ديالك راه حشمني مع المقدم كا تعطلت غي حا الشواي كا صيبتنا انتصحرو بيه هاد الليلة هههههه .
طبتم وطابت اوقاتكم بالخير و دامت لكم البسمة.

توقيع: عزيز البورقادي

اقرء المزيد