طرائف عمي بوشتى

السلام عليكم يا مجمع الكرام 
عمي بوشتى مشى صلى المغرب فجامع وجا للدار ايقفقف بالبرد غي وصل لباب الدار وسهال ايعيط
بوشتى. اااا الصافية الصافيا افاينك اطفلا
الصافية. هانا ابابا فصطيحة شني ايخاصك 
بوشتى. كلشي ايخصني 
الصافيا. لواه ابابا من حدي معاك حتى حاجة ما دخصك
بوشتى. ايييه من حدك احداي .. راني انفكر كيف ماشي يكونلي نهار دمشي لدارك
الصافية حشمث واحناث راسا قداما وقالت فنفسا فقاش يجي داك النهار
بوشتى. ما عندك لاش دحشم ابنتي هذي هي الدنيا اجي ابنتي شعلي داك الطرفازة وسير عمرلي حالكاس دالقهوة نسخن بيه مسارني
الصافية. فاش ماشي تفرج دابا ابابا الخطبة حتى لتمنية ونص
بوشتى. شني ماشي يخطبو عليا راهم فضحونا غي الحمى القرعية للبقر وداك وين وان للبشر.هاذ الليلة راهم ماشي يبينو حاد اطفل من الحد فترفازة مشارك فسبانباط اسمعتم ايهضرو عليه فجامع
شوفلك إو على مو سربوب انا انهضر معاها وهي غي ادفرنس
الصافيا. البرنامج سميتو سداند اب وهذاك الدري اسميتو ادم بلحاج
بوشتى. ونتي فاين ادعرفو
الصافيا. راهم كوزوه داااك النهار دالسبت وراه انجح نتينا كنت معروض فطغص عند عياد
بوشتى. التسول راهم بلاواث وخلاص فاين ما مشاو ايلقيو بلاصتم .. فاينهيا يماك
الصافيا. راها ادوجد حاذ بوشيارة
بوشتى. هاذا ما لقاث مزيان فزمانا سير سير عمر القهوة واجي دغيا.

توقيع: ندى بيلا

اقرء المزيد

تولية طولانطية

هذا واحد العطار جبلي جا أيدور فالدوار وقت الكرموس وصل لحد الدار وخرجتلو طاطا العلامية الله يتولاها برحمتو صحن دالكرموس وزميثة حطاثالو وبقا غي أيشوف فيها وبغا يتريگل عليها قالا وريني كيف أدعملو دكلو هذي الله يرحم الوالدين( مع العلم أن جبالة من أهم المناطق انتاجا للكرموس) ، إوا وتگلسلك طاطا العلامية وبقاث على داك الكرموس وحدة فعنقا وحدة ففاها ووحدة فيدا أدمرغ فزميثا وداكل حتى كملتلو داك الصحن وقالتلو إوا هيثا أيعملولا ، قالا إوا جبلي حشويش الله يخليك ، قالثلو إوا باركا عليك هاد المرة غي تعلم والمرة الماجة عاد كول وخلاثو غي حال فاه وأيشوف. وتحية للمرأة التولية.

توقيع: أنوار زياد

اقرء المزيد

طرائف عمي بوشتى

باسم الله نبدا لكلام وعلى نبينا نصليوا بالدوام .
الحادگة ما تحتاج معاها كلام.
والمعگازة ما ينفع معاها سبان.
الحادگة تبان حداگتها فالطعام .والفنيانة تقثلك غير بالهم.الى اعطاك العاطي لاتحرث لا تواطي. بحال محمد البورقادي.
ناض الفروج يا سيادي ينادي كيف ديما ما تحتاج معاه اصريمة من حيث مأصل واشغالو قايم بيه. صاب عمي بوشتى سبقو هاد الليلة من حيث معول يسافر للمدينة.ودادة حادة كيف العادة وجداث القهوة دشم ريحثا من الحجرة لكحلة والى ماتيقتوني سقصيوا علال والشريف يحلف وسهام دقول آمين.افطر عمي بوشتى ولبس السروال لبيط بالتكة وارمى على كتافو اجلابة لمخطة.وقال لحادة انا ماشي لمدينة نقضي شي صخرة وانتي نوضي حمو يخرج داك النعجاث يضحيوا ويطول داك الهروية حذا الناذر ومينسشاي داك لمشخار يرميلو واحد اللهوة دالتبن .ردث اعليه حادة حمو مريط رآه البارح قلك راسو كيحرقو .
عمي بوشتى : زول من قدامي ياوجه موكة صبحنا على الله .حمو وا حمو آنوض اداك لحلاسة.
حمو: آه آآآه راني مربط آبابا .
حادة: آميمتي على وليدي عنداك يكون جاه داك المرط دقالو اعليه فالطرفازة .
عمي بوشتى: كيلاقي هاد المرط عاوث.كل نهار اجيبولي شي حاجة اجديدة من هاد المشقوف والله كمكان ايفكري فشي ناس اعزاز وشي ذكريات مزيانة غلا شقفت بوه
حمو:ايقلولو هايش وان
عمي بوشتى:كينشي هيش قدك ابل الضبع لاخور.
نوض تگعد من تماك وسير لتحت العين جيب شي درع دفليو طيبولك يماك مع التيشة وشوف شي كاغيط دالسكار واعمل فيه فليو وكميه وبقا ادبوخ منخنافرك.هاداك رآه قابطك غير المرط دالشمايث آالشماثة قلك الهايش وايش.
والقصة هنا وقفاث.
اوا راكم عارفين لخبار فراسكوم.

توقيع: أبو إلياس الأشهب

اقرء المزيد

طرائف دادة حادة

مساء الخير عليكم،،
أمنجانا يجبه الخير،،
أنا لي هي أنا فوزية هايثة أيلغيولي ،،
قنطت شواي فالمدينة أنظل غير ليل ونهار بين 4حيوط ، ماشي يسمعني سي ادريس قلت 4 يجبلو الله أنهدر على التعدد ههه،
الحاصول بغيت نبدل الجو ونيحي الرحيم مع حبابي وناسي فبلادي،
شديت الكار أخياتي ومشيث حتى وصلت لبلاد عند طاطا حليمة الجارة دادة حادة،
أنا تميث ماشية فالعقبة وأنا نݣلس ،واحدشويش وقف حدايا واحد ااشيباني سقساني قالي مانيين أننتينا ،قلثو أنا من المدينة الحاج وهو يتبسم ويطحك ااشيباني عجبو الحال منين قثلو الحاج ، ويهو يقولي عندمن جايا قثلو جيت عند طاطا حليمة ، قالي مرحبا بيك ، واقيلة عييث فهاد العقبة أنتما ياها الناس دالمدينة دغية أيتحشو ليكم داك الركابي ، قلثلو إييه الحاج ، وهو يطحك ، وأنا دخلني الشك بالطحك ديالو ، المهم ركبني على البهيمة ديالو ووصلني حتى لباب الدار طاطا حليمة،
داق فباب طاطا حليمة ،
ودقول شكون،
قالها غبى أنا ؟
طاطا حليمة خرجت ،كا انت ؟
هانا وصلتلك هالضيفة جبرتا سخفانة فالطريق ،
طاطا حليمة، الله يكتر خيرك ،
وأنا أنبنسي مع راسي شكون هاد الرجل ؟
سلمت على طاطا حليمة ودخلت للغرفة دالضياف ، توحاشتك أطاطا بزاف وأنا نقول نجي ،( طاطا هي مراة عمي)
طاطا فين هو عمي توحشتو ،
طاطا حليمة ،، يودي عمك مشى لسوق ومزال مجا معات لياه تعطل،،
أنا إيوة الغايب حجتو معاه،
الشيبابي ،،
مشى لدارو ، من الباب وا حدا جدا هاو ،
دادة حادة ، أمالك ياراجل ؟
الشيباني طاطا حليمة جاو عندا شي ضياف من المدينة،
أودي شني ماشينقولك هاد الناس دالمدينة فنيانين طايحين من العين دالشواري،
دادة حادة ، وشكون هاد الناس؟
منعرف ، أنا سقسيثا قالت من المدينه ،
دادة حادة ، حتى مو العصر ونمشي عند طاطا حليمة،،
وأنا مزالة معرفت شكون هاد الشيباني هههه
وا حادة ،
وا نعم،
وأنتي قي لغدة وعيطلم يتغداو عندنا ، لاش ماشدمشي ،إلا تسعفني مدمشيش،
دادة حادة ، واخة اراجل،
المهم دازت داك ليلة زوينة عند طاطا حليمة وعمي،
فالصباح،
دادة حادة جايا عند طاطا حليمة ،
وا صباح الخير أحليمة كيف صبحت لباس ،قالولي عندك الضياف من المدينة ،
صباح الخير والربح أ حادة ، إيه ألحبيبة هادي فوزية بنت لوسي لي ساكنين فالمدينة ،
دادة حادة ، أه إيوة مرحبا بيها وناس المدينة،
أحليمة أيوة لطيبباش لغدة هاد النهار ، راكم ماتغداو عندي انتي وضيافك،
طاطا حليمة،، انشعاالله أحادة،
الحاصول الشيباني منين دخلت عندو وهو بسقسي فية،
شوية بدأ يجبد حس الزواج،
وأنا مع بالي كنقول ياكما هذا هو سي إدريس ابو الياس مول التعدد؟هههه
حشواي وهو يعطيلو عمي ، وا بوشتى نوض نمشيو نصليو فالجامع،،
وأنا يغلبني الطحك ههه، عمي بوشى ايبحلق فية،
وهو يقول لعمي ، هاد بنت خاك باينة ضرايفة مدعطيهاليشي ؟
والمحاين دالحوساين 😂😂
الحاج بوشتى وعقلو فاين،،
شد الطريق لسوق دالاثناين،،
بغى يعدد وحادة مصابثلو لاين،،
عمي بوشتى عينيه تحلو والكلام سي ادريس بدا يتصنتلو،
الحاصول هههه
غير قبلو عليا أول مرة نكتب قصة خيالية ،
وخة هي خالية من اللهجة التسولية ههه ولكن معليش شوية بشوية حتى نجيبها هي هاديك هي،،
تحياتي يا خياتي.

توقيع: فوزية المعلم

اقرء المزيد

الوشام

السلام عليكم ورحمة الله وبركاته

السقارة والهدانة ياك ما نعستو شحال فالمgانة؟ ماشي نشارك معاكم موضوع جاني على الgانة
شحال هادي كان عندنا لعبار و لقياس فالزين
العيناين كوحلين والحواجب مgرونين ولفا صغير والحناك حومرين
وخا هاد الشروط كاملين المرا ايزينا الوشام ما ايعرفو لا حلال ولاحرام والعروسة ايلقيولا الفال يوشمولا فيداها ووجاها
او عنقا ورجلاها
وكان الوشام يميز المرا المتزوجة
اما اللي ما فيها وشام باقيا ممزوجا
وهنا ماشي نقولكم حد المقطع دحاد الغناي غناه فالعرس دولد خالي كنت انا باقي صغير وعاقل عليه :
قال الغناي :
يا الطير الغادي بلغلي سلام
والى لقيت حبيبي قلو شي كلام اخويا نشكي لداك العزبة ما فيها وشام خلاتني فالقهرة نبكي فالمنام .. ... .......
ولي بغا يكمل ها لمراح
اما حاليا ولا الوشام موضة عند شي وحدين . العيادو بالله منم . ايقلعو القلب و ايطلعو قيدود ما دقدشي دشوف فيهم .
قبلو عليا وعلى المودة نلتقي.

توقيع: محمد البورقادي

اقرء المزيد

عمي بوشتى و الديك

حاد النهار كان الصيف و بنادم مسكين مفتون مع الفلاحة ايقيل فتامارة الكحلة من الخمسة دالصباح حتى للطناش د الليل .
عمي بوشتى وعياد قيالين فالنادر يدرسو القماح والشمش شاعلة والحرارة واصلة لشي سبعة وخمسين وعبسلام ايهز التوادل من تافة ويرميلم فالحالة دالنادر ومقابلم بالما مرة مرة ايمشي يعمرلم حاد البيدو ملوي فحاد الخنشة دالقنب فازكة بالما. وحدهوم ودادة حادة فالنوالة ايطيبو المطلوع وايوجدولم ما ياكلو ويجيبولم للنادر يعتقو بوحبل
حتى غابت الشمش وودنت المغرب عاد سالاو الدراس وروحو حاد الشواي تعوفو و مع كان شواي دالعوين دغيا ناضو صفاو داك القماح وبركوه ولقاواه فالخناشي ودخلوه للدار كا وتفارقو كلها مشى ينعس فدارو .
عمي بوشتى تمغط ولقى راسو على الوسادة ما كاملاشي دقيقة دالماكانة حتى بدا يشخر
حاد الشواي وحادة سمعت الدقان فالباب
طاق طاق طاق
حادة : بوشتى أبوشتى بوشتى
بوشتى : آه (ما عرفتش نكتبا المهم راكوم عرفتوها كيفاش كتنطق)
حادة : الدقان فالباب نوض شوف شكون
بوشتى : نعس نعس راك وقيلا ادنوم شكو مشي يدق عليا فهاد النصاصا دالليل
طاق طاق طاق
حادة : أنوض أ الراجل الدقان فالباب كا ما ادسمعشاي
ناض عمي بوشتى ايدودح دور على البلغة صاب غي فردة ، الفردة لخرا كان ايلعب بيها المجحوم ماعاث فاين رماها ، لبسا فرجل ولقى الصندلة دحادة فالرجل لخرا حيت بيناتم غي جوج نماري حتى حادة عندا شي فراكح تبارك الله قاد الرزامة ، وهز لاتريك شعلا وخرج .
فتح عمي بوشتى الباب وهو يجبر المقدم واقف فالباب .
بوشتى : أهلل المقدم . أهلل . ياك لاباس ؟
المقدم : ما كاين باس أودي أ بوشتى غي كث فمكلسة معروض عند شي ناس و رايح لداري والدار مازالا بعيدة فبني عبد الله و الصباط ضبرني لبستو باقي دجديد ما خلاشاي فيا ورازي تسلخو بجوج وما قديتشاي نكمل حتى للدار وقلث نبات عندك نروح حتى للصباح عاد نكمل الطريق
حادة : أ شكون أبوشتى ؟
بوشتى : أ غي المقدم
حادة : أويلي ياك ما لاقي عاوث شي زبلة
بوشتى : يزبلو عليك البقار أ الفا دالمجرة . زيد زيد دخل أسي حميد زيد مرحبا بيك الدار دارك
بوشتى دخل المقدم للدار ومشى عند حادة
بوشتى : نهار نكون انهدر مع العباد فالباب ودبقى دلاغيلي نريبلك داك الفا . ايوا هاني فاي علمتك . يالاه نوض وجدنا ما ناكلو راه المقدم ضلام عليه الحال و مشي يباث عندنا هاد الليلة
حادة : يباث فالحبس بن المجوعف لاخور ما صاب فيواخ يجي حتى تناصص الليل
ناضت دادة حادة على سعدا ووعدا طيبتلم شواي دمطيشة و قلاتلم شي فليفلات وعمرت حاد البراد داتاي ونزلاتولم على الطبلة و رجعت فحالا دنعس .
عمي بوشتى : مرحبا بالمقدم ونهار كبير هدا وقبل علينا والله يا غي الموجود واها حتى الدجاج ما بقيناشي انعلامو حتى بروg . ها اللي قاصو بوقيبش ها اللي عباثو حلايمو بنت ليهوذية غي حاد الدجاجة عندا شي فليلسين ادجرم موراها هي دي باقية ادور .
المقدم : لا دقولشي هاد الهضرة أ بوشتى كا حنا ما انعرفوكشاي . هادي دار الخير والجود والكرم
بوشتى : زيد هاد الفليفلة الله يرحم الوالدين ما حراشاي بزاف
المقدم : الله يجعل البركة والله فيها ما حشمت
بوشتى : واقيلا نجيبلك شي قهيوة انتينا انعرفك عزيزة عليك القهوة ما ادخطيهاشاي
المقدم : مادا بينا أبوشتى الله يجيك الخير
ناض عمي بوشتى يجيب القهوة جبر دادة حادة شاخرة من داك العام . هي هاديك سخن القهوة و جابا وجا .
هوما هايثاك وحاد الدك دعياد ضربو حمار الليل ما عاث كيف وقعلو حتى نقز وجا فالمراح دبوشتى وبدا يصرخ ويطول فالصريخ ويعاود حسابو الفجر علم كا و عمي بوشتى و المقدم بقاو هدا ايشوف فهدا وعمي بوشتى جمدلو الما فالركابي ونشاتو العرق وحشم من المقدم وما صابشي ما يقول وبقا حال فاه ماعرف هاد لقضا مناين نزل عليه هما هيثاك وعياد حتى خلط عليهم ودق فالباب خرج عندو عمي بوشتى
بوشتى : هههههههه والله يا كث عارفك نتينا قبل ما نحل الباب
عياد : باش عرفتني ؟
بوشتى : انا نزلت القهوة فوق الطبلة ونتينا دجي لبالي . دخل دخل أ المهيبط دخل
دخل عياد جبر المقدم عند عمي بوشتى سلم عليه و كلس شرب معاهم القهوة وتم نايض
عياد : أودي سمحولي على هاد المجية فالنصاصات الليل انا غي سمعت حاد البالا دحاد الدك ديالي ايصرخ عندكوم فالمراح و جيت ليلو نعبيه
بوشتى : كا هاد المصيبة ديالك . ايوا دابا جيت جيت كلس قصر معانا شواي وعبي داك المسخوط ديالك راه حشمني مع المقدم كا تعطلت غي حا الشواي كا صيبتنا انتصحرو بيه هاد الليلة هههههه .
طبتم وطابت اوقاتكم بالخير و دامت لكم البسمة.

توقيع: عزيز البورقادي

اقرء المزيد

طرائف عمي بوشتى

السلام عليكم مجمع الكرام والصلاة والسلام على خير الانام

عمي بوشتى مورك فالغرفة ايتفرج هو ودادة حادة وحداهم حد الصينية داتاي وشي عراش دالشيبة فحاد الغطر والصافيا قابطة الطريفو ادشوف فيه ودطحك. 
عمي بوشتى : الله يستر ايطحكوك الجنون ؟ غي ادفرنس مع داك المشقوف . ما بقينا اناكلو حتى حاجة فخطا ، رجعت مفتونة غا فوقاش دسالي ودقبط هاد العجب .
دادة حادة : انعيا نقولا نزل هاد الخرشاش وهي ادغلط راسا .
الصافيا ( حنات راسا ) : ايما كلها والبلية ديالو .
عمي بوشتى : ادمعني عليا ابنت اليهودي لاخور .( هز حد العرش دالشيبة وشير عليها زعما ضربا )
الصافيا ( طحكت) : ابابا الحبيب غي طحكت معاكم . سمع راني انقرا حد المنشور فالمجموعة دالتول . 
عمي بوشتى : ايهدرو علينا عاونيث ؟ 
الصافيا : الا ابابا قالك هذا شي واحيد سرق شي حاجة كتبا الشريف فالمجموعة مناين عاود على عبد السلام مناين عبا يما لوجدة ومشى لقاها فمجموعة اخرى زعما هو دكاتبا . 
عمي بوشتى : يعزابو ماشي يشوفو حد ، هو نشرا فالارطرنيط وقالك ديالو . ما يعزابوشاي الخبر بحا النفخ دغيا ايسرح .
الصافيا : اوا حتى الشريف فضحو .
عمي بوشتى : الله يعطيه الصحة يا ودي . قالك دما صاب ما يربط يربط لسانو .
الصافيا : بحالاش ابابا ؟ 
عمي بوشتى : ماشي نعاودالك كي الخرافة . هذا فكرون خرج من الما يتسمر فوق حالحجرة، خرج راسو وبدا ايهدر. قال : دما صاب ما يربط يربط لسانو . حد مسخوط الوالدين طماع gايز سمعو .قال انا ماشي نعبي هاد الفكرون للسلطان وماشي يغنيني . لقا الفكرون فقبو وعباه وطلب الإذن يدخل على السلطان. دخلوه قالو : نعام اسيدي جبتلك حد الفكرون ايهدر .
السلطان : ارا نشوف . 
جبد السيد الفكرون وبقى عليه هدر ، هدر ، الفكرون مكمش ما هدر ما والو 
السلطان طلعلو الgاز قالو : اطحك عليا .عيط على العسا قالم عبيواه لمقطع الدم طيرولو راسو .
عباو السيد باش يقطعولو راسو وبقى الفكرون وهو يخرج راسو وقالم : عطيو لبوه رجليه جابوه . 
السلطان تيق السيد وصافط ديقولم هداو . 
الصافيا : نفهم من من كلامك ابابا دي لقى الذنب ايستاهل العقوبة ؟ ياك ابابا ؟ 
عمي بوشتى : الله يرضي عليك ابنتي ادفهما طايرا . اوا نوض لقيلي شواي دالما نتوضى نمشي للجامع ونشوفو شني جاري فهاد الدوار .

وعلى المودة نلتقي

توقيع: رقية البورقادي

اقرء المزيد

قالوا زمان 07

يعودبرنامج قالوا زمان بعد غيبةطويلة،في جزءه السابع
كل بشهوتك ،،،،،ولبس بشهوةالناس
السوق،،،،،،،،،،،،،،،،،،مايعمر مع العصر
يلاصلحث خريشه،،،،اش عندنا ف خريش
ولد الشارب ،،،،،،ايخدم على اللحيه
ولداللحيه،،،،،،،،،،ايخدم على الناس
الراجل ف الراجل،،،،،،،والكسوه فضل
لي ما قدوقبرو،،،،،،يحمل ضيقو
ماثت الحماره،،،،،،،،وتقطعث الزياره
حرفت بوه،،،،،،،،،ما تغلبوه
ما ايشباه ف بابه،،،،،،،غير الديب
ايلعب على ،،،،،،خيل الضياف
العين ما شافث ،،،،،والقلب ما توجع
ما بياشي موت الحماره،،،،،،بي شفايث الحما____ره
لي ماعرفك،،،،،،،،،ء،،،،خسرك
سير،،اهنده،قل،لبنده،،،،العيد غدا
المرسوله،،،،،،،،،ما جيب الگمح
عطيني عويشه بنتك،،،،،وعطيني عولتها گمح
نوض ايمه،،،،،،خلي مراتي دگلس
الكرش اجيب،،،،الصباغ والدباغ
لي خلص دينو،،،،،،شبع
عز الخيل،،،،،،،مرابضها
لادحرث المعلق،،،لادزوج المطلق،،،لاتصحب المقلق
قالو يمنا على الله،،،،،،،،قالو الله يربحك
جاج الصباح ،،،،،ايتقبطو،ف،العشي
كل الدواقه،،،،،،،،،،،،،،وهرس الماعون
حلوف،،،،،،،،،گرموس
يلا،دخلث الصمايم بالعبوس،،،،،،،،،
يفرح مول النخله وينكد مول الكرموس
الشتا،،،،،ضلام،،الربيع،،،منام،،،الصيف،،،زحام،،الخريف،،هداك هو العام....
الى هنا ينتهي هذا الجزء والى فرصةاخرى دمتم في رعاية الله!!!!/
والى لغزالحلقة،،من القاءل،وما هي المناسبه
((فين يلقيلا،،،الطفر)).

توقيع: جمال لشخم

اقرء المزيد

منزلة البولدة

السلام عليكم مجمع لحباب
شخباركم وكي لاقيين مع البرد والنفنافي واش شاعلين شي عوافي او تحت لكواش ناعسين.
البلدة برفع الباء منزلة من المنازل الفلاحية تمتد فترته ما بين 22 و3 يناير وتكون البرودة شديدة في هذه الفترة .
يقول الناس : في البلدة يضرب الصمر للكبدة ويرد العروسة جلدة والعكوزة قردة .
وبمناسبة هاد البرد ماشي نعاودلكم حاد الطرفة : هذا حد الراجل فيه الحيول وعارف المرا عندا الموينة
عملا الطريق باش يعبيهالا .جا عندا مغوبش ومقلق . قالتلو: مالك ؟
قالا : غي سكوث المرا ، راحنا معروضين لحاد الفيشطة ولايني شرطو علينا نلبسو مزيان وانا معنديش الحوايج.
قالتلو : شمن حوايج ؟
قالا : خاصني جلاب دالملف وسلهام وووو قالتلو : انا نعطيك الفلوس وانت شري الحوايج ليلي وليلك .
مشى شرا لراسو باش يدفي جنابو وشرا للمرا كل ما هو مزيان ولكن الثوب رقيق ما ايدفيها ما يسخنا.
لبسو حوايجم ومشاو للفيشطة عباها لحد جبل عالي وخلاها دشبع برد .
قالتلو فاين هم هاد الناس آالراجل . قالا : دابا يجيو . كلسو ايعاينو هو ملوي فالسلهام وهي ادموت بالبرد . سمع سنانا ايتقرقبو ففاها .
قالا : ياك ما بردت االحبيبة دقلبي ؟ قالتلو : انا من هاد الناس دماشي يجيو عندي . صبر شواي وسمح فيها ومشى ايبهنس وخلاها . مشى وهي مسكينة تزوات بالبرد وجمدت وماتت.
مشى عند حبابا ايتبوحط عليهم وقالم ما جاتش عندكم فلانة؟
قالولو : لا .
قالم يلاهو ندورو عليها عباهم معاه ومشى ايدور عليها حتى وصلو للجبل فاين خلاها وجبروها ميتة .
المسخوط قتلا وتهنا منا وبقاتلو لحصييصة وايقولا. كيف نتينا مع شتا ولغربي الحبيبة د قلبي.
لي عندا شي حصييصة دحطي راسا هدي وصايا.

توقيع: محمد البورقادي

اقرء المزيد

كيد النسا ام كيد الرجال؟

السلام عليكم مجمع الكرام والصلاة والسلام على خير الأنام

المرا والراجل كل واحد يكمل الآخر ودائما يعتبر الرجل تاج فوق رأس المرأة رغم الخلافات وكثرة الأخذ والرد .
قصتنا اليوم بطلتها امرأة اسمها عيشة نزيدها على عيشات اللي هدرنا عليهم . هاد عيشة مرا مكافحة متزوجة من رجل اعمى ايقولو كان عندو الخير والخمير ولكن اصبح الله كريم ما ايعلام ما ايسعلام .كانت عيشة هادي ادقدر( القش) ودبيع باش دعيش هي وراجلا . مسكينة كانت اضرب تمارة وادقول للراجل الله يرحملك الوالدين شيش معاك الدجاج لا دخليهمش يgوزولي فالقش . هو واخا حافظ الدار كاملة والنملة الى gازت ايعرفا ، ايبدا يضرب فداك القش بلعاني وايهرسلا كلشي ودولي هي مسكينة دعاود من الاول . وايبقى يعايرا من الفوق زعما هي مقصرا فحقو . هي مرا صبارة ادخليه على خاطرو وهو ايبقى يقولا يداك حورش رجلاك مشقفين بالعجين دادقا وهي صابرا للهدرا ديالو . حد النهار قالتلو الراجل غي gابل معايا هاد القش ونزوجك .
السيد فرح وخدم معاها مزيان .gازت ايام والسيد ايعاين .
قالا: اوا المرا فاين العروسة دقلت ماشي دجيبلي؟
قالتلو : غدا نجيبالك .
ناضت فالصباح وجمعت دارا ونقات حالتا ولبست حوايجا ورطبت يدايا ورجلاها بالسقلا وgلست فالركنة . عيطت عليه قالتلو : آالراجل ها العروسة فالبيت .
جا تفتف على البلاصة دنعتتلو وgلس حداها قبطا من يدا وبدا يهدر معاها وهي ساكتة .قالا قولي غي شني سميتك ؟
صغرت الصوت ديالا وقالتلو : عيشة .
قالا : سبحان الله ، هي عيشة وانت عيشة غي انت رطبة وهي حرشة .
سكتت ، بقا عليها اوا هدر . هدر االمرا مالك ؟
قالت( مرققة صوتها ) : انشوف راسي ما عنديش الزهر عبيتك عور وما ادعلام ما ادسعلام .
قال : غي صبر على رزقك ، راني عندي الموينة . عندي حالكموسة داللويز والفضة والفلوس مدفونة تحت الرحى .
تفاجأت المرا وولات لصوتا الحقيقي وقالتلو : ياك ابلعور لاخور gوزت عمري معاك صابرا وانخدم عليك وانت زايدا بالنية الناقصة . اوا انا عيشة ما كاينة لا رطبة ولا حرشة .كاينة عيشة وحدة عاشت معاك بالنية والصبر وانت ماشي ماعيا بقلة النية والغدر .
هو غي سمع الصوت دعيشة نبهط وبقى غاحال فاه . عايناتو يرد عليها ما ردشاي مجgلاتو وهو يطيح . كان مول الأمانة عبى أمانتو .
السيد مات وعيشة الصبارة ضرباتا بورثا .

وعلى المودة نلتقي

توقيع: رقية البورقادي

اقرء المزيد

حقيقة عيشة قنديشة

ارتبط اسم عيشة قنديشة في المخيال التسولي والمغربي عامة بالجن والرعب والقبح، فكنا نقول حين نرى فتاة منكوشة الشعر وقبيحة المنظر إنها تشبه عيشة قنديشة، كما كنا نفسر كل الخوارق والخيالات التي تصادفنا ليلا في بعض المناطق بوجود عيشة قنديشة، وتكثر الأساطير والخرافات حول هاته الشخصية الأسطورية. ولكن يبدو أننا كنا مخطئين تماما في كل ما يتعلق بهاته المرأة الصالحة، فقد وجدت وأنا أطالع كتاب: الإعلام بمن حل مراكش وأغمات من الأعلام، للقاضي العباس بن إبراهيم السملالي، الجزء التاسع، صفحة 416، الترجمة 1497 ما نصه:
عيشة قنديشة: الولية الصالحة لمشهورة، سئلت عن القطب فأجابت بأنه سيدي الزوين المجذوب الذي كان يلقط المخ ويطبخه ويأكله، كان يأتيها السلطان سيدي محمد بن عبد الرحمان في خلافته الصغرى وكانت تغزل الشتب وتعمله حبالا تخاط به البرادع، وتقتات من ذلك، وما فضل ترميه في محلها، فلما ماتت وجد الشتب الذي كانت تغزله كله حرير، وكانت تقول: الصماري والغماري وحكامة الدراري، واللبن في الحفاري، مغطي بالشواري، وتدخل الثيران وتخرج الفيران، تشير إلى الغلاء الذي حدث، وانحباس المطر وموت كبراء الولاة وتولية الأحداث، وذهاب الأخيار وظهور الأشرار.
توفيت رحمة الله عليها ودفنت بمقبرة باب أغمات.

ويبدو من ترجمتها أنها كانت امرأة مهابة الجانب، صادعة بالحق، معارضة شرسة للنظام، لا تخشى في الله لومة لائم، ولعل هذا هو السبب الحقيقي في تشويه صورتها ورسمها على تلك الصورة البشعة.

وعلى المودة نلتقي.
طبتم وطابت أوقاتكم بكل خير.

توقيع: أحمد لزعر التسولي

اقرء المزيد