الغولة والغول

الغولة والغول 

********** ******** ************ ********** **

قالو ناسنا لولين فخيارة كانت تسكن الغولة والغول 

عاودو شلا حكايات شلا خرايف خلاو عقلي مشغول 

كنت نسمع لحكاية يركبني الخوف يركبني الهول 
قالت الجدة وحكات على بويغزن مول دراع لمفتول
فخيارة حابس الواد عيونو قنديل وفمو محلول
اليوم كبرت بغيت نعرف قصة الغولة والغول
فكرت ندير تحقيق ونكون على القضية مسؤول
سولت ناس لبراس غياتة بني وراين وأهل تسول
قالو تهجم على الدوار ولي جا فطريقها منكول
تخلق الفتنة و الرعب فطريقها يتلف المحصول
تصفيها لخضر واليابس متخلي كرموس ولا سبول
قالو كان غداها الحلحول
عشاها الحريرة بلفول
في الصيف الكرموس والزعبول
حتى واحد معطاني لا جواب شافي ولا كلام مقبول
فكرت نكمل غايتي باش نعرف لكدوب من المعقول
بغيت نعرف واش هي غير خرافة ولا انا مهبول
قررت نهز رحيلي وفبلادي نسول ونجول
تساريت المغرب عرض وطول
سولت أهل الفن ناس الفرجة و فن القول
قالو فترتنا حديدان المهيول والبهلول
سولت ناس الرياضة من كل الأصول
قالو عندنا التونسي نبيل معلول
سولت أهل الشريعة وناس العلم و المعقول
قالو عندنا خالد بن الوليد سيف الله المسلول
قلت مع راسي هاد لحكاية ما دكرها لا نبي ولا رسول
يمكن غير خرافة حديتها بين لجيال سارح منقول
طويت المحضر وكتبت قصيدة ضد مجهول

                                                        

                           

تصنيف : خرافات تسولية